現代人已經受西方飲食習慣影響,食肉多咗好多。雖然香港、日本都好似食好多海產咁,但其實都係畀人話蔬菜不足,Fast food肉類太多,影響健康之類。
以往,可能有D朋友一想起想食魚,就開車去西貢、鯉魚門、香港仔等食海鮮。但係我諗日中咁忙,依家好少人會咁神心。
日本人食魚,除咗刺身外,最常見嘅煮法,一定係燒。因為係最簡單唔需要花巧嘅調味可以食到魚鮮。我好開心搵到間旺區中嘅燒魚專門店呀!雖然店小小,但係地舖,坐吧枱,好似返咗日本咁。可以近距離見到廚師燒魚,搭嘴兩句。除咗睇Menu點菜,最好就係直接問廚師有咩新鮮嘢好介紹啦。
呢度大部分海產都係日本魚市場返貨,高級嘅喜之次,大廚都掌握得火候好好,燒到皮脆肉滑,保留到魚鮮,肉唔乾,味道不會太濃,剛剛好。平時只有魚嘅一夜干,我見到Menu有雞髀一夜干,一問之下,知到係廚師自家製,即點,又係燒到皮脆脆,鹹鹹香香,送酒一流!
其實呢類燒魚專門店日本好多,可以見到廚功夫之外,食魚又唔油膩,香口食物又好送酒,所以好受歡迎,見到香港有開,真係好開心,又有好去處!
坂奈御膳 地址:銅鑼灣謝斐道468號百達中心地下E號舖
電話:2886 2062
【Kei San 小檔案】
日本北海道出生。居港超過三十年,能操流利廣東話,年輕時出國留學,畢業後走訪海外多國工作的關係,練就出獨立自「煮」的好手藝,對食材的選擇也有心得,因此被傳媒發掘,活躍於各大報章雜誌的烹飪示範及美食專題,更有幸參與不少電視節目演出及主持,是料理達人及美食家,日本飲食文化的傳道者。
圖說 1)條喜之次,本身油分夠,肉又滑,燒起後都好Juicy
2)呢個燒白鱔真係好,皮脆到好似食超薄薯片咁,魚又無乾。
3)左起:魚雷魚、冰魚、多春魚,嘩!真係好多年無食北海道冰魚,好開心!
4)呢個雞髀一夜干有D似中國嘅臘鴨髀,好正! |