咖啡嘅來源已經係無從稽考喇,其中一個說法就係咖啡原產地埃塞俄比亞西南部嘅一個高原地區,據說喺成千年前有個牧羊人發現啲羊食咗一種植物之後,就變到好鬼興奮,之後就意外發現咗咖啡喇。無論如何,依家飲咖啡確實已經成為咗一種學問喇,乜嘢虹吸法、烘焙、萃取、貓屎咖啡……所有所有呢啲學名,真係代表住每一個唔同範疇嘅咖啡知識喇!
講喬亞歐意咖啡,你未必識!之但係一話張智霖飲嗰款咖啡呢,肯定你即刻有記憶!男神做代言喎,唔飲得都睇得啦。飲完好似同男神擁抱咁喎,我大食小記點都要朝聖下嘅。
喺大量廣告嘅宣傳,再加上明星效應下,咁喬亞歐意咖啡係有佢令人着迷嘅條件嘅。口味方面……咪當飲緊奶茶囉。甜就甜咗啲,怕肥嘅姐妹就飲小啲,睇下男神個機師look就算。
大食小記
我大食小記太愛張生啦!喺唔睇憎面都睇佛面嘅大環境下,我梗係要畀高分啦!
米奇
我一定唔會畀高分囉。太太太太甜啦,完全無咖啡嘅味,得奶味。
Chris
我都唔會俾高分㗎。似奶茶多過似咖啡,一啲都品嘗唔到咖啡嘅質感。
奶路臣
其實包裝幾靚,奶味係好重。唔啱我口味,我鍾意咖啡嘅苦澀味㗎。
麥斯威爾夠出奇!
麥斯威爾都出名㗎,不過呢隻韓版就少見啲!喺零食店見到佢,唔突出嘅包裝,但係有韓文咁特別,就買佢返嚟睇睇真章先!呢鋪勁喇,會唔會就係呢隻韓版黑馬跑出呢?
包裝同質量成咗正比,唔突出嘅包裝配搭住無味嘅咖啡,真係好match!但係都有評審認為嗅覺嘅享受大於味覺……總次就發現到實有人鐘意呢款咖啡嘅大道理囉。
大食小記
好香!好有咖啡香味!其他就一啲都唔特別……因為佢係無味,連咖啡經常過盛嘅甜味同奶味都無。
米奇
一打開好香嘅咖啡味湧出嚟,心諗掂啦!實正,唔畀高分都要讚多啲佢。點知飲咗之後,真係算啦。完全唔知飲緊乜,都無味嘅。
Chris
真係世界級!唔知點解可以有咁強嘅香味,但飲落去就同口感啦、醇啦、奶味啦完全無關係囉。
奶路臣
我會畀高分係因為嗰股咖啡香!我鍾意飲咖啡嘅好大原因係因為香味!我着重嗅覺多過味覺,所以覺得呢款幾好㗎。
大路之選雀巢咖啡
每一個早上,每一間辦公室,每一所學校,點都會見到佢嘅存在。呢一款罐裝咖啡皇者,就真係要睇下得唔得評審嘅歡心啦。
雖然係家喻戶曉,但依然留唔住評審高傲嘅心。睇得出評審對於咖啡嘅香味大於只係着重滑嘅咖啡,所以雀巢咖啡都爭取唔到高分數。
大食小記
雖然我好想畀高分啲呢一款咖啡,但係飲太多,對佢無情意結,仲覺得有啲悶。雖然日夜都會飲,但只係提神飲品。
米奇
我日日飲,都飲慣咗佢隻味,唯有投下感性嘅分數。咁始終都算係滑嘅,但咖啡味都係少啲囉。
Chris
都幾滑嘅,但都唔會呃到我分數囉。咖啡太多奶所以滑,但都係因為太多奶所以似用奶粉開嘅咁。
奶路臣
只不過係滑啲,但嗰股奶味我真係頂唔順囉。香味唔係咖啡香,只不過係奶香。我拒絕俾分!
四洲咖啡屋之紫菜咖啡
四洲紫菜我就食得多啊,四洲咖啡我就真係未飲過。雖然我大食小記早有耳聞,呢隻其實咖啡都好唔錯,但都係要會一會先知箇中真諦,就睇下佢可唔可以得到評審所愛!
好明顯四洲咖啡屋好受評審嘅歡迎啦!大家都一致認為咖啡各方面配合得恰到好處,而最重要嘅係入口嘅口感能夠滿足到評審嘅味蕾。
大食小記
好味,好細滑啊,其實仲有淡淡嘅咖啡香味添!加上佢夠大罐,飲完又飲,好似飲唔完咁。絕對有資格高分過我男神。
Chris
其實一打開罐咖啡,香氣都噴出黎㗎喇。加上咖啡味啱啱好,仲有種醇厚嘅質感,好配合我對咖啡嘅需要。
米奇
我賜予佢極高評分。因為佢有一個字:好!有奶所以滑,但唔會過甜,又有股濃郁嘅咖啡香氣。
奶路臣
佢冇咖啡嘅苦澀味,但又有一種厚實嘅口感,又醇又香又夠飲,又可以發揮到咖啡提神嘅用處。
真係估唔到竟然係四洲咖啡屋力壓一眾罐裝咖啡名牌,突圍而出!嗱,所以真係唔好以為名牌咖啡就好味,黑馬嘅實力真係不容小覷。不過呢……其實飲罐裝咖啡真係好肥囉,所以我大食小記都係小飲為妙,我怕遲啲大食媽唔認得我啊。其實咖啡,好多人日常飲嘅估計都係罐裝咖啡啦,當然對於有閒情逸致嘅人嚟講,買咖啡豆返嚟煮口味就更好,但係現代人都好忙,罐裝咖啡就即刻成為咗首選,所以今次嘅比併可以畀大家參考參考下。
而我大食小記,亦終於喺今次比併之中,搵到咖啡界男神以外嘅黑馬王子喇!