啲人成日話「隔籬飯香」，其實隔籬飯有幾香呢？Anyway，我大食小記之前教大家整嘅「叮叮cupcake」都受歡迎喎，好，今期再嚟好嘢益大家先！我近排發掘到電飯煲嘅新潛能，其實係同啲網友傾傾下，發現原來一班姊妹出嚟girl's talk，梗係要有啤酒嘅，但好多時都飲唔完㗎喎，咁就一定唔可以浪費啦。 仲有啊，近排咖啡久不久都會大減價，不過買咗十幾廿罐返嚟，飲咗肯定瞓唔着，基本上買咗返嚟原來得個擺字，一樣係唔可以浪費㗎。一於係咁！拎個電飯煲，放一堆洗咗嘅米落去，再倒啲啤酒或者咖啡落去，就用電飯煲煲出香噴噴嘅「啤酒飯」同「咖啡飯」啦！Text◎大食小記 Photo◎Raby
啤酒飯
無錯！啤酒都可以煮飯！其實啤酒煮飯真係會較易令人接受嘅，平時都聽阿媽講用啤酒煮嘢食，例如啤酒煮蜆啊、啤酒炆牛肉啊、啤酒雞翼啊咁。平時用啤酒煮嘢食，仲可以去腥味雪味，咁啤酒煮飯你又覺得點呢？快啲跟我大食小記試下啦！
點整先？
嗱，首先就要將蒜頭切粒，之後可以將米、雞肉粒、蒜粒，一齊倒入電飯煲，再加入啤酒，落少少鹽，落埋淡味醬油，即係喺一啲超市裏面會出現嘅低鹽醬油喇。開電飯煲，同平時煮飯咁一樣，然後等佢跳掣，打開飯蓋，搵個碗，搵隻spoon，食啦！
專業團隊試食
小紬：「成個飯都好香，重點係蒜味！加上雞肉唔老，啤酒做到鬆肉嘅功用。兩樣嘢估唔到可以match到咁，令我想一食再食。佢好似台灣麻油雞嗰隻味道，所以好唔錯。呢個飯係色香味俱全。」
米奇：「成個飯都好入味。因為加咗蒜真係一絕，嗰隻香味真係不得了，諗起都想食。雞其實無乜啤酒香，不過都幾好味，可能有其他啲調味料，所以都好正。啤酒又唔會整到啲飯好乾，仲好濕潤，所以口感都好好。」
Max：「本來以為係個伏，點知食落又幾好，算大食小記今次終於放我一馬。不過我覺得可以再香啲，應該要好似『中華一番』咁讚就差唔多啦，仲要係爆三嗰隻。不過對大食小記嚟講算係咁啦！」
華華：「好似醉雞咁嘅味，仲要好香，令到成間房都香噴噴。呢個飯每一粒米都令人垂涎三尺，一個字『正』！」
抄士：「香！香！好香！呢個飯絕對係好滋味。啤酒絕對能夠帶出整個飯嘅餘香！嚿雞仲可以送埋飯，食完係要再食。加上整法咁簡單，真係一個好好食嘅『頹』飯。」
------------------------
咖啡飯
整完啤酒飯，就嚟整咖啡飯喇！唔好以為我大食小記講笑啊，真係直接用飲品代替清水，放入電飯煲煮就得㗎喇。呢個咖啡飯其實係我大食小記同啲日本網民傾傾下炮製出嚟嘅，佢哋就再喺網上公開食譜，咁我就再喺度將呢個咁認真嘅食譜發揚光大啦！
點整先？
步驟好簡單㗎咋，煮飯時要落幾多水，你就落返同等分量嘅咖啡。當今次煲一樣係煲兩mug米啦，就落350毫升嘅罐裝無糖咖啡，然後好似平時煮飯咁煮。記得煮熟咗就再攪下啲飯，呢個時侯已經聞到陣陣嘅咖啡香味，之後再因應你嘅個人口味，加啲鹽啊、胡椒啊、芝麻啊嗰類調味料就搞掂啦！叮一聲！咪有得食囉。
專業團隊試食
小紬：「其實比想像中好。我本身係怕有苦味或者怪味，點知無，都算係咁啦！最唔好嘅係啲味道太單一，只係得啲咖啡味。其實我覺得加啲蔬菜會變得fresh啲，加啲肉又會口感好啲，或者加下啲紫菜、白芝麻嗰類嘅調味料會靚好多，色彩會更美。」
米奇：「飯太乾啦！加上飯無咗應有嘅濕度，無乜口感。我建議下次試加水、加鹽或者可以加下『咖啡伴侶』，咁樣隻味應該會正好多。咖啡飯嘅感覺同魚飯好似，但係變咗咖啡味。論味道就更加係好一般啦，所以係可以再改善一番。」
Max：「個飯係滿足到嗅覺，但係滿足唔到我嘅味覺呢。香得嚟但係食落又無味，要加下其他嘢調下味會好啲。」
華華：「呢個係另類飲咖啡嘅方法，啲飯有種咖啡嘅甘同香，飲完我仲好似精神咗????啊！不過我建議加下肉加下調味料會好啲嘅，始終依家太似就咁食緊淨飯喇，食飯要配下餸先正。」
抄士：「有咖啡香，食落去唔夠濕，有啲乾。加上佢有啲啲甜仲有啲啲苦，一個咁奇怪嘅煮法煮得出咁嘅味算係咁啦。要加下其他配料會更好，或者有其他色會更靚。我建議一下大食小記可以試下用奶都應該會唔錯。」
---------------
總 結
幾乎每個香港人嘅屋企都有個電飯煲，洗幾粒米、煮個飯、撳個掣，相信幾懶嘅人都可以做到！呢個教學有無令你學懂何謂「一鑊熟」呢？仲熟得好正正子。以後姊妹們唔使再妒忌市面上只有「男人嘅浪漫」嘅豆腐火腩飯喇，我哋女人嘅浪漫就係咖啡飯，男人們就可以轉下你嘅浪漫食下啤酒飯囉！
喺呢度我大食小記再畀多個tips大家啦，其實用有奶或者有糖嘅咖啡煮咖啡飯，製成品會似咖啡甜品。如果用無糖咖啡，就要加入鹽等調味料，先會更加好味。啤酒飯遠睇似糯米飯，但係真係唔使怕酒精濃度高，因為煮嘅時候已經蒸發咗咁滯。我大食小記今次自己就不加評語喇，評審啲評語夠中肯啦，費事你哋成日話我自誇啊。我真係入得廚房出得廳堂㗎，應該好快就可以嫁出去喇！ |
搜尋新聞
