2018年 12月 14日
星期五
   | 氣 溫 : 17 度
搜尋新聞
簡体中文
即時新聞 視頻新聞 要聞港聞 社 評國際兩岸 財 經 娛 樂 體 育 馬 經 副 刊 昔 日電子報

【㗎仔遊食】北陸食の旅
發佈日期 : 2018-01-10

本欄作者Kei San
我諗小朋友去到福井見到恐龍會比我更興奮
香箱蟹便當用晒成隻蟹,好豐富啊
左面一碟用咗活締法劏魚,魚肉都透明D
香箱蟹、越前蟹,幾千円都有交易
本欄作者Kei San
我諗小朋友去到福井見到恐龍會比我更興奮

12月去咗幾日日本海一帶,我哋叫做「北陸地方」,包括富山縣、石川縣、福井縣。呢一帶海產好豐富,溫泉亦多,其實自古以來,日本人在國內都好鍾意去呢幾度,係有名旅遊選擇。尤其2015年開通咗北陸新幹線,可以直達金澤(石川縣),真係快捷方便好多啊!去北陸梗係要食海鮮啦!壽司刺身當然要,蟹更係冬季當造,必食之選。


我由金澤去福井坐新幹線期間都買咗個「香箱蟹弁当」車上嘆,要爭取食多幾餐嘛!蟹肉、蟹子、蟹膏全部做成軍艦同散壽司飯,好豐富啊!我仲買咗當地有名嘅「笹の葉寿司」,用竹葉包住一件件鯖魚、鯛魚、鮭魚壽司。福井除咗蟹,都盛產鯖魚同鯛魚,呢個壽司做法,係日本人保存海產醋壽司嘅方法。


去到福井車站,即刻見到好幾個恐龍像迎接我,因為福井係日本最早發現恐龍化石之地。到埗後即時有朋友車我去「越前漁協」,一個鐘就到咗海岸漁場。見到「越前」呢個字,大家一定會聯想到越前蟹。其實蟹種同北海道松葉蟹一樣,但只有喺福井捕獲嘅大隻雄性蟹先可以叫越前蟹。雌性就叫「香箱蟹」。去到當地漁市場,大大小小size都有,500日圓至數萬日圓不等呢。


今次最有趣係去到漁協會一試即劏鰈魚,大家見相中左右兩碟好似一樣,但其實兩碟係唔同處理,其中一碟用咗「活締法」技術,係用長針插入魚身,直接破壞魚腦神經,使魚無痛楚,咁肉色就可以保持鮮明及透明感,而且因為長針從頭至尾快速貫穿魚脊髓上嘅神經,魚肉唔會收緊,魚身保持嫩滑,而且保鮮日數可延長。兩者比較咁食,鮮味同質感都好明顯,又上一課呢!



【Kei San 小檔案】
日本北海道出生。居港超過三十年,能操流利廣東話,年輕時出國留學,畢業後走訪海外多國工作的關係,練就出獨立自「煮」的好手藝,對食材的選擇也有心得,因此被傳媒發掘,活躍於各大報章雜誌的烹飪示範及美食專題,更有幸參與不少電視節目演出及主持,是料理達人及美食家,日本飲食文化的傳道者。



圖說
1)我諗小朋友去到福井見到恐龍會比我更興奮。


2)個香箱蟹便當用晒成隻蟹,好似去日本料理店食一樣咁豐富啊 !


3)左面一碟就用咗活締法劏魚,魚肉都透明D !


4)香箱蟹、越前蟹,幾千円都有交易,但要自己拆肉囉 !

您可能有興趣:


首頁