近期因工作關係去幾次福井,雖然每次去飲飲食食都係工作之一,但有時行程中都會爭取時間去下觀光。上次就去「福井縣立恐龍博物館」,令我感覺返回少年時代,好Enjoy,好似學生旅行咁,最近又上映Jurassic World,去完博物館再去睇戲,零舍覺得自己對恐龍好熟咁,睇戲都多100倍開心。
其實去完博物館後回程中途見到個好大城堡,但據知福井已經無遺留落古城,僅餘城牆遺址已成為縣政府廳及警察總部,點解會有呢個城呢?問問人,再去睇下,原來呢個叫做「勝山城博物館」。係由勝山市出身實業家出資建成,裏面有不少歷史資料,都會公開公眾入場。城堡周圍種有櫻花樹、楓樹等,春夏秋冬四季景色都唔同。呢度,當地人仲推介我一家要試牛奶雪糕,問店就城堡入口附近,係無添加,自家製軟雪糕同奶製甜品,叫「茶屋」。
間甜品店係由位於福井縣奧越前高原「Lovely牧場」直營,所以Menu,使用材料都可以一手包辦,用每日新鮮搾牛奶做成軟雪糕及Gelato,亦有賣低溫殺菌牛奶、泡芙、布甸、曲奇等,都好多選擇,全部Home made。我就試軟雪糕同布甸,好濃奶味,自然甜味,完全唔膩。我仲同店員傾偈,知道作地100%用牛奶製甜品,完全唔落水,唔怪得咁香濃呢!香港朋友可能覺得牛奶一定係北海道出名,福井都一D唔輸呀!
聽店員話,「Lovely牧場」仲可以體驗搾牛奶、做牛油、BBQ等,如果有充足時間,去完恐龍博物館,仲可以去牧場玩,一日行程就好充實呢!
Lovely牧場 網址:http://lovelyfarm.lovepop.jp/(日本語Only)
[Kei San 小檔案] 日本北海道出生。居港超過三十年,能操流利廣東話,年輕時出國留學,畢業後走訪海外多國工作的關係,練就出獨立自「煮」的好手藝,對食材的選擇也有心得,因此被傳媒發掘,活躍於各大報章雜誌的烹飪示範及美食專題,更有幸參與不少電視節目演出及主持,是料理達人及美食家,日本飲食文化的傳道者。
圖說 1)甜品店小小,雖然喺郊外,又係平日,我都見不時有人光顧,當地好多Fans呢!
2)布甸有蛋味及牛奶味,開胃可試晒。
3)筒裝牛奶,好似卡通片先會見到,好童話啊 !
4)呢杯軟雪糕,係咪好Lovely呢?
|