日本和牛喺香港可以話已企穩陣腳,不但日本料理店,就算中西菜都好常用。仲要人人都已知和牛所分嘅等級,識食A3至A5嘅高級貨。呢個等級分別主要睇和牛紅肉同白肉(脂肪)嘅分布及比例,紅白分布愈細緻平均就最佳、等級愈高,以A5為主等。
我同和牛都幾有緣份,好幾次參觀過和牛屠場,今次就試咗銅鑼灣和牛專門店千里屋食堂。此公司1991年已喺大阪開店至今已有10間店,賣肉類及有燒肉店等。今年初已來港開首間海外和牛專門店,自己係牛肉店專家,直接輸入和牛,有咁嘅背景,對牛嘅品質,來貨價格控制等一定有信心。
今次係首次推出研究咗3年嘅鹿兒島黑毛和牛,連日本都未推出市場就選香港做首站。新牛種個名好特別,叫「浪漫牛」,係鹿兒島大學、鹿兒島縣、JA Kimotsuki、千里屋等合力研發,用鹿兒島產的黑毛種子牛,只用當地提供嘅飼料飼養,可謂100% 純日本產和牛肉。飼料裏有米、燒酒粕、澱粉粕等日本傳統食材,再養20個月,油花分布比率係BMS6,列為上等。新品種和牛不同之處係牛肉嘅維他命E及胡羅蔔素濃度和油酸值極高,有營養而且牛肉味更濃。去年鹿兒島黑毛和牛更於「全國和牛能力共進會」贏得第一位。
「浪漫牛」全年暫時只產50隻,係黑毛和牛中極品。而千里屋日本方面仲特別揀出三個最好嘅部位只供應香港市場,當中有肉味濃郁嘅和牛西冷(Sirloin)、口感彈牙有咬口嘅和牛五花肉牛扒(Karubi),以及油脂豐富嘅夏多里昂(Chateaubriand),其夏多里昂即係牛柳中最中間一部分,每隻牛只有1.5至2KG,紅肉部分好柔軟有肉香又保留到脂肪,真係肉質好纖細,係我食過和牛中牛味最好嘅。最開心係食堂Feel,好Casual而且價錢好相宜,幾百蚊就食到和牛餐,真係好突破!
地址:銅鑼灣駱克道447-449號中威商業大廈地下2號舖 電話:2336 2770
[Kei San 小檔案] 日本北海道出生。居港超過三十年,能操流利廣東話,年輕時出國留學,畢業後走訪海外多國工作的關係,練就出獨立自「煮」的好手藝,對食材的選擇也有心得,因此被傳媒發掘,活躍於各大報章雜誌的烹飪示範及美食專題,更有幸參與不少電視節目演出及主持,是料理達人及美食家,日本飲食文化的傳道者。
圖說 1)睇下呢件就係夏多里昂,脂肪比例啱啱好,好有肉香,大家食Medium rare 最好。
2)成個和牛夏多里昂牛扒套餐先$580,由前菜至甜品共6點,牛扒更用鐵板上,好Happy。
3)想輕巧D,有丼套餐,韓式燒牛肉鹽燒雞肉蓋飯,牛肉用浪漫牛其他部位,韓國泡菜風味炮製。
4)香港首發,中間年輕嘅係千里屋社長公子亀田先生,聯同各研發團隊來港。
|