記得第一次去新潟,一出新潟駅印象係「咁香酒味嘅!」
由香港坐飛機去東京,再轉新幹線去新潟,全程要10小時,所以一出車站聞到酒香,幾醒神!住宿嘅酒店只距離車站步行15分鐘,決定行去,順便睇下D酒香係邊度傳出嚟。沿路見拉麵店、居酒屋、蕎麥店,亦有Kawaii女仔企喺門口嘅酒吧,到酒店Check in 都在意酒店有無酒香?入到房內都一路聞。
安頓咗即刻出動,向當地地道料理店進發。呢個時候都仲係覺得四圍有酒香。(笑)
經驗中去其他縣飲清酒,大家都多配海產,好少配肉類。新潟面向日本海,魚產當然豐富,當地刺身一定唔少得,其實和牛及豚肉都有名,鄉土料理亦有炆煮東西,飲日本酒配食物,最簡單唔會錯就係邊度出產就配邊度嘅料理食材,新潟酒藏數目不少,起碼90家以上,在日本國內數一數二,要試唔同味道個性嘅酒,配唔同料理變化好多。
最開心去到當地可以飲「熱燗」添。香港人似乎未係好習慣,或未認識清酒可以熱飲;其實清酒唔同溫度嘅變化,味道都唔同,加上各銘柄自有特色,又可以配不同料理,十分好玩。
我喜歡嘅係新潟嘅酒藏,唔一定要去到好郊區,市內已可揾到有歷史酒藏,好似「今代司酒造」,有250年歷史,就係新潟車站附近,而且設酒藏見學。近年今代司會開發新派D嘅清酒,例如特別適合配蠔,亦有酒樽設計有錦鯉,都得到唔同大獎,值得一去。
最能展現到新潟酒文化嘅當然係每件3月一年一度嘅酒陣!我已去過兩年,每年都大排長龍,人山人海好熱鬧,係十幾萬人入場!
如果想試下新潟酒,今年11月有「香港新潟日本酒祭2018」,先嚟個熱身再去新潟。
香港新潟酒祭 網頁:http://afoods247.com/sakefestival.html
今代司酒造 網頁:http://imayotsukasa.co.jp/
[Kei San 小檔案] 日本北海道出生。居港超過三十年,能操流利廣東話,年輕時出國留學,畢業後走訪海外多國工作的關係,練就出獨立自「煮」的好手藝,對食材的選擇也有心得,因此被傳媒發掘,活躍於各大報章雜誌的烹飪示範及美食專題,更有幸參與不少電視節目演出及主持,是料理達人及美食家,日本飲食文化的傳道者。
圖說 1)新潟市內有個魚市場,可以買到當地產魚鮮、蔬菜、米、酒等,仲可以即時order烹煮,好方便。
2)唔好以為新潟只有魚,試過佢地低溫豚肉都好嫩好味。
3)今司代酒藏內有見學部分,可睇到作地酒嘅歷史同認識清酒釀製過程。
4)每年酒陣可以一次過試到90個酒藏嘅酒,真係好難得,有玩有食好滿足。
|