以往香港食鐵板燒畀人感覺一定好貴，一定要開貴酒，由頭食到尾一個套餐，埋單時會嚇你一跳，終於有間好Reasonable又有質素出現。
呢間畀我感覺好Casual，因為名為鐵板燒居酒屋，有鐵板吧檯之外，其餘係一般居酒屋卡位及椅，感覺自在，可隨便Order單點菜式，鐵板菜式如是，唔一定套餐。
鐵板燒食材都係日本直送新鮮水產，尤其多由青森縣來，其他和牛、豚肉、雞肉等都係日本產，季節性蔬菜更唔少得。呢度不時周日仲會有朝市，即是Pop-up賣日本新鮮直送蔬菜，好新鮮又平。
鐵板主廚已有25年經驗泊谷大廚本身家族都係日本做鐵板料理，所以廚藝一定有信心。
我最享受係大廚好親切，除Menu上菜式，基本你想食咩，佢都可以做畀你。大阪燒也好、炒麵也好，以至高級食材，客人Order就可以配合，好靈活。唔坐吧一樣可以Order 鐵板，亦可以食到刺身等日本居酒屋料理，Very good呢。
開心，呢度仲有駐場名譽唎酒師同有經驗Bar Tender，你唔知點咩清酒好？有已配好酒料理選擇，又或者來個清酒Omakase，唎酒師就會為你當日點料理揀3款酒，可以係清酒，或者雞尾酒都得，完全唔使自己傷腦筋。
近年日本Gin大熱，香港已開始受注目，呢度有世界各地三十多款Gin，Bar Tender上次就介紹有龍蝦味Gin，櫻花味、抹茶味等，又玩出多款Cocktail，聽佢講解飲法，玩味十足，即刻愛上Gin添。食完飯坐酒吧區歎兩杯都好舒服呢！
和幸創作鐵板居酒屋
地址：灣仔摩理臣山道23號南洋酒店2樓
電話：3460 4498
[Kei San 小檔案]
日本北海道出生。居港超過三十年，能操流利廣東話，年輕時出國留學，畢業後走訪海外多國工作的關係，練就出獨立自「煮」的好手藝，對食材的選擇也有心得，因此被傳媒發掘，活躍於各大報章雜誌的烹飪示範及美食專題，更有幸參與不少電視節目演出及主持，是料理達人及美食家，日本飲食文化的傳道者。
圖說
1)呢度好多款Gin，Gin Tonic只係$88，可以試多幾杯。
2)亦有配小食Gin雞尾酒餐，用伯爵茶、檸檬等配玫瑰花Gin，女士一定喜歡。
3)有已配好清酒Set，好似原條鐵板青森魚配紀土山田錦純米大吟釀。$185
4)唎酒師為鐵板廣島蠔配咗有氣清酒，仲係獲2018 Sake Competition 氣酒金賞，一流。
5)泊谷真樹主廚父親在東京亦開鐵板燒店，自己有25年經驗，信心保證。
|
搜尋新聞
