【本報記者報道】在處境劇飾演「賈名媛」一角的邱芷微（Chelffy）在社交網站公布喜訊，接受本身是武打演員的男友陳志忠（Wilson）的求婚，結束10年愛情長跑，揭開人生另一頁。兩人10來經歷病患，Wilson在2020年患胃癌，切除了八分之七胃部，前年才完成化療，而邱芷微在四年前患上類風濕關節炎。邱芷微接受傳媒訪問時表示，「我同佢都一齊咗10年，經歷咗好多嘢，所以大家都好有感觸」。

邱芷微在帖文寫道：「非常驚喜的一個下午！I SAID YES。我完全冇諗過今日Wilson會在星元素五周年Party中，在咁多位賓客、雙方家人、學生及家長中見證下求婚。成日話佢功夫佬正正直直，但估唔到Wilson都有浪漫的一面，原來這個秘密的行動，佢籌備咗個幾月。」她續寫：「當中我倆甜酸苦辣都經歷過，真係唔容易，但令我們互相成長，互相包容，從而令大家順利一步一步地邁向人生另一階段。Thank you Wilson。感謝你。」

邱芷微接受傳媒訪問時表示：「都幾驚喜及感動，冇諗過佢求婚過程會有咁感性嘅一面。仲有竟然夠膽喺咁多人面前唱兩首歌。結婚就應該下年年頭擺酒，不過都要同家人們傾細節才決定定日子。講到造人計劃，我因為而家食緊生物製劑，所以都要先同醫生傾好，再計劃停藥及轉藥方案才可進行。」談到10年經歷，邱芷微直言殊不容易：「我同佢都一齊咗10年，經歷咗好多嘢，所以大家都好有感觸。佢而家身體好健康，起碼食嘢多過我。所以唔覺得佢曾經患病冇咗個胃。」

Wilson曾經參與拍攝ViuTV劇集《反起跑線聯盟》，而星元素演藝學院在五年前創立，前日五周年慶典，他在親友和學員及家長的見證下，拿住鮮花與鑽戒向女友跪地求婚，邱芷微哽咽說「我願意」，全場立即掌聲雷動。

Wilson在社交網帖文透露：「She say yes，人生終於可以進入另一個新階段好興奮好開心。6月30日其實Chelffy開頭揀呢一日純粹係為咗舉辦演藝學院五周年會慶。但我暗地裏籌備求婚項目。我偷偷地上網了解6月30日呢一日，發現原來630係代表同你嘅愛人表達愛意。而且今年2024年6月30日原來係大吉日做任何事情都會順利。好像冥冥中有安排，今日所有事情都進行得非常順利。我相信Chelffy都非常難忘。特別要多謝我一班兄弟秘密團隊，秘密協助，令我可以順順利利，多謝大家。」