【本報記者報道】由導演邱禮濤執導的《暗殺風暴》鐵定12月9日上映,故事講述飾演警員的張智霖(Chilam)追兇十年苦無頭緒,而扮演其未婚妻的胡杏兒在一宗由神秘人「Darker」主謀之爆炸案中無辜喪生,案件更冇證據慘變懸案。十年之後,「Darker」再次出沒預告殺人,Chilam誓要追捕對方,制止罪惡,為未婚妻之死尋找真相。
基於故事鋪排,胡杏兒的角色「孟芸」一開場就慘被炸死,此後Chilam經常幻想杏兒在身邊,儼如心靈雞湯,杏兒覺得這個角色很特別:「呢個角色大部分出自於Chilam角色嘅幻想,因為角色意外死咗,裏面有千絲萬縷嘅故事,但我出現嘅方法幾特別。」
首次大銀幕鬥戲 杏兒讚Chilam好玩
Chilam和杏兒曾先後合作劇集《衝上雲霄II》及《魚躍在花見》等,杏兒表示,很喜歡Chilam對演戲的想法,大家每次合作都有不同火花,今次大銀幕首度拍檔亦有新鮮感,尤其是杏兒有一幕臨場背對白的戲,令她印象很深刻。
杏兒說:「我個角色係Chilam諗出嚟嘅人物,所以每次都傾下你覺得我係點架?我記得有一場戲本來嘅對白係佢講,我冇背到佢啲對白,但突然間佢話唔係喎,呢場戲應該係『孟芸』講,跟住我即刻現場背,係好長嘅對白,都有啲壓力,因為係講大家開緊會,對白係啲資料性嘅嘢,又要講到好熟,都係一個難度,佢真係考起我,但有挑戰都有滿足感。」杏兒稱讚Chilam是個好演員,應該拍更多戲,又指Chilam又是個好玩和風趣的人,大家開工時會好開心、好輕鬆。
Chilam:杏兒非常專業 態度一流
Chilam和杏兒多次合作,Chilam說,杏兒向來對演出非常認真和專業,態度一流。對於杏兒在片場臨時背對白,他稱:「大家現場有溝通,係覺得呢段對白由佢講會更加適合,唔會難到佢,佢記性咁好。」
Chilam又說,拍《暗》片很順利和開心,除了杏兒,古天樂、吳鎮宇和邱禮濤導演亦時有合作,而且大家好喜歡拍邱導演的電影,因為對方對劇情、拍攝的處理及掌控時間等各方面都很有經驗和準繩,令演員安心又開心。
「暗黑」海報系列曝光 古天樂型
此外,電影公司昨天推出了10位演員古天樂、張智霖、吳鎮宇、胡杏兒、周秀娜、蔡瀚億、呂良偉、姜皓文、陳國坤及陸永的「暗黑」系列海報,以配合新片宣傳。佘詩曼在電影內特別演出,友情演出呂良偉、任達華、姜皓文、洪天明及林燕玲等。 |
您可能有興趣:
|