【本報記者報道】歌手江海迦（AGA）日前於東莞銀行藍球中心舉行《AGA ONEDERFUL LIVE》的第二站巡迴演唱會，全場爆滿。AGA今次更邀請了薛凱琪（Fiona）任表演嘉賓，她指Fiona在其創作生涯中非常重要。

AGA出道前還是一位作曲人，創作3年都未獲任何歌手賞識，直到Fiona聽到《Better Me》demo，便向公司表示一定要錄這首歌，結果令AGA成功賣出第一首作品，這首歌亦是她人生中第一首創作的歌曲，所以AGA至今仍然很感激Fiona的賞識。

AGA說：「《Better Me》係我人生中嘅第一首歌，點解會寫？因為失戀囉，第一次失去一段感情嘅時候，我覺得好可惜，就喺度諗究竟自己做錯啲咩呢？每次唱呢首歌，我都會激發自己，勿忘初心，be a better me。我做作曲人嘅時期，3年來都無人欣賞我啲歌，即到有一日，零晨3點有人message我，話呢首歌嘅訊息同故事令佢好感動，跟住呢首歌仲好受歡迎，令我覺得原來我都得㗎喎，我都可以寫到歌，非常之多謝你，唱我呢首歌。」

AGA爆失戀寫《Better Me》

Fiona亦覺這首歌療癒了自己，她對AGA說：「你唔單止係寫到歌，你仲唱到歌，又跳到舞。你原來係因為失戀寫呢首歌，雖然你係愛情上嘅失戀，但我係成個人生都失戀嘅時候，人生呀，個腦呀，好多方面都……就係因為呢首歌嘅demo鼓勵咗我。所以我就同公司講我一定要唱呢首歌，其實我當時隻碟係已經夠晒歌，但我都一定要唱。你以為你做一首歌療癒自己嘅心靈，其實你都療癒咗我，同埋幫助咗好多人療癒佢哋嘅心情。我真係好想同你講，我好多謝你。希望你嚟緊可以再作多啲歌，俾多啲正能量我哋。」

兩人更首次同台合唱《Better me》，AGA更一度感觸得眼泛淚光。AGA表示今次演唱會見到很多熟識的面孔，有很多香港朋友及fans都組團來支持，而且成都、東莞、佛山、廣州等地的fans都有跟著AGA一起走巡迴，令她相當開心。

日前AGA綵排時，不小心弄傷了右腳，膝頭位置筋腱發炎，非常疼痛。她原本想忍痛完成所有舞步部分，但由於舞台設計呈斜傾角度，加上開場時solo部份有些坐在地上的舞步，會對膝頭蓋做成壓力，故此排舞師特意改動舞步，AGA能順利完成演出。

AGA唱出《一》、《圓》、《Wonderful U》等首本名曲時，台下觀眾全場大合唱，場面感人。最後AGA與全場觀眾及工作人員拍攝大合照，演唱會圓滿結束。