【本報記者報道】由王心慰（Amy姐）監製的無綫新劇《隱門》，大講人性黑暗面，加上演賊王的吳岱融演得夠喪，黃智雯（Mandy）遭對方真打，睇得觀眾叫爽。劇集獲不少網民追捧，就連Mandy也對現場被打的逼真感大叫「正」，至於演Mandy「衰老公」Mike的黃子恆，坦言一早預角色不討好，最緊要觀眾睇得投入。
前晚（5月31日）一集，黃智雯飾演的心月辛苦酬得的200萬，於賊王吳岱融與阿Ray（陳展鵬飾）打鬥期間全數跌落海，同時亦因被盧宛茵飾演的奶奶及老公Mike揭發借大耳窿慘遭公審。雖然Mandy劇中經常一臉苦情，但網民相當受落，大讚她多了分成熟美、愈來愈靚兼角色有新鮮感。
慘變「生人勿近」
談到角色要同時面對衰老竇、衰老公及衰奶奶連環逼迫，Mandy笑言壓力爆煲，並指自己慘變「生人勿近」，Mandy說：「呢個角色一直唔可以坦率面對身邊人，身心靈又受到好大壓抑同威脅，其實係好痛苦。自己拍嗰時都放鬆唔到條橡筋，啲幕後話拍嗰時唔敢行埋我度。」
Mandy又笑指遭吳岱融打出「真感情」：「拍衝突場口我哋大家都冇話特別留力，嗰種逼真感帶動到我反應更加真實，我覺得正嘅。」為了準備角色，Mandy更專誠上了一個短期心理學課程：「主要想了解番喺唔健康家庭成長、身心靈受創嘅小朋友，對佢哋日後成長有咩影響。」
黃子恆又做「反派」
除了心月，圍繞其身邊的衰老公Mike、毒舌奶奶亦惹起關注，尤其為了50萬對心月連番尖酸刻薄，更讓不少觀眾激心。其實子恆首集出場時已被鬧爆「衰到貼地」，單是死都不聽老婆電話，已盡顯其自私性格。對於被指再做「反派」，子恆謂雖然曾涉獵過多種角色，但像阿Mike這種衰老公角色卻是第一次。
子恆表示：「唔好話觀眾想打呢個衰老公，我自己睇劇本都覺得呢個人唔抵幫，有啲對白真係幾自私，又孤寒。呢方面編劇係應記一功，好短時間之內用有限嘅對白同劇情，將個角色塑造出嚟。」
「御用惡家婆」入型入格
子恆續指是次是繼《降魔的》後再與Mandy合作，並笑謂上一次也是負責欺負Mandy。談到角色對白涼薄，問子恆拍攝時有否心理負擔，他笑言最緊要觀眾睇得過癮：「我講對白都冇乜顧慮，因為都知呢個角色一定唔討好，但每套劇每個角色有唔同功能，既然方向係咁，我咪全心全意去做，最緊要觀眾睇完有反應。」至於做開惡家婆的盧宛茵，雖然角色惹人厭，但網民指她「只要戚起條眉，啲氣勢就係咁嚟」，大讚入型入格。
|
搜尋新聞
