【本报记者报道】由王心慰（Amy姐）监制的无綫新剧《隐门》，大讲人性黑暗面，加上演贼王的吴岱融演得够丧，黄智雯（Mandy）遭对方真打，睇得观众叫爽。剧集获不少网民追捧，就连Mandy也对现场被打的逼真感大叫「正」，至于演Mandy「衰老公」Mike的黄子恆，坦言一早预角色不讨好，最紧要观众睇得投入。
前晚（5月31日）一集，黄智雯饰演的心月辛苦酬得的200万，于贼王吴岱融与阿Ray（陈展鹏饰）打斗期间全数跌落海，同时亦因被卢宛茵饰演的奶奶及老公Mike揭发借大耳窿惨遭公审。虽然Mandy剧中经常一脸苦情，但网民相当受落，大赞她多了分成熟美、愈来愈靓兼角色有新鲜感。
惨变「生人勿近」
谈到角色要同时面对衰老窦、衰老公及衰奶奶连环逼迫，Mandy笑言压力爆煲，并指自己惨变「生人勿近」，Mandy说：「呢个角色一直唔可以坦率面对身边人，身心灵又受到好大压抑同威胁，其实係好痛苦。自己拍嗰时都放松唔到条橡筋，啲幕后话拍嗰时唔敢行埋我度。」
Mandy又笑指遭吴岱融打出「真感情」：「拍冲突场口我哋大家都没话特别留力，嗰种逼真感带动到我反应更加真实，我觉得正嘅。」为了准备角色，Mandy更专诚上了一个短期心理学课程：「主要想了解番喺唔健康家庭成长、身心灵受创嘅小朋友，对佢哋日后成长有咩影响。」
黄子恆又做「反派」
除了心月，围绕其身边的衰老公Mike、毒舌奶奶亦惹起关注，尤其为了50万对心月连番尖酸刻薄，更让不少观众激心。其实子恆首集出场时已被闹爆「衰到贴地」，单是死都不听老婆电话，已尽显其自私性格。对于被指再做「反派」，子恆谓虽然曾涉猎过多种角色，但像阿Mike这种衰老公角色却是第一次。
子恆表示：「唔好话观众想打呢个衰老公，我自己睇剧本都觉得呢个人唔抵帮，有啲对白真係几自私，又孤寒。呢方面编剧係应记一功，好短时间之内用有限嘅对白同剧情，将个角色塑造出嚟。」
「御用恶家婆」入型入格
子恆续指是次是继《降魔的》后再与Mandy合作，并笑谓上一次也是负责欺负Mandy。谈到角色对白凉薄，问子恆拍摄时有否心理负担，他笑言最紧要观众睇得过瘾：「我讲对白都没乜顾虑，因为都知呢个角色一定唔讨好，但每套剧每个角色有唔同功能，既然方向係咁，我咪全心全意去做，最紧要观众睇完有反应。」至于做开恶家婆的卢宛茵，虽然角色惹人厌，但网民指她「只要戚起条眉，啲气势就係咁嚟」，大赞入型入格。
|
搜寻新闻
