「賈名媛」邱芷微大秀急口令，網民讚好。

【本報記者報道】無綫處境劇《愛.回家之開心速遞》中的「賈名媛」邱芷微（Chelffy），日前她在該劇中大秀急口令一幕，獲網民大讚清楚標準，還要顧及記走位及演技，認真不簡單。

Chelffy在社交平台分享自己在現場及事前練習的片段，並逐一答謝網民及分享自己如何鍊成這成果。Chelffy表示第一次表演急口令都緊張，因此很多人問花了多少時間練習：「這場戲是拍攝前1星期才收到劇本，當我看到有急口令場口都心知唔容易，你叫我普通玩就容易，但要做埋戲就唔容易㗎喇！短短幾句急口令，雖然要記熟唔難，但要加上動作表情及聲線運用就需要花時間練習。」

她續說：「起碼要做到所有嘢加埋都唔甩，仲要收放自如。由於當時唔清楚拍攝時導演需要甚麼速度及語氣，因此當我練習時，每種速度及演繹方式都有練習及研究。」

Chelffy更笑言練習期間更影響了男朋友、學生及家長，結果齊齊挑戰她：「我真係好似痴線婆咁個口日練夜練，因為我想練到個腦唔使諗都講到，佢哋聽到就梗係好奇我講乜。可能因為平時唔會特別留意我講嘢有冇咬字清楚，但一玩急口令，個個都重點放在咬字發音問題。平時我教學生講對白咬字要清楚，今次演出真係一個完美的示範。我冇諗過學生及家長都好投入玩呢段急口令，甚至挑戰其他急口令。」

被問到有何秘訣，Chelffy表示：「可能自己本身係歌手，我當咗好似平時唱歌玩Rap咁。但急口令沒有音樂，因此我會搵我嘅節奏及音調來展示屬於自己的版本。」

幫姜麗文平反

談到有網民嫌棄飾演Lisa的姜麗文（Lesley）於全劇演出的口音好煩厭，更把兩人的演出作比較，Chelffy大讚對方演繹恰到好處：「其實佢要用呢啲聲線做戲都唔容易，我真係試過。因為這集劇情去到最後話我唔覺意學咗Lisa講嘢，雖然得一句對白要學佢講嘢，但其實要諗點樣講得唔正，甚至要練習捲脷都唔容易。因為唔同國籍講廣東話唔正嘅口音都有唔同。喺現場我亦都有向Lesley請教，所以我覺得佢一直以來非常用心，是個好演員，值得讚賞。」