【本報記者報道】由王晶擔任製作人的無綫劇《一舞傾城》，雖然有不少觀眾批評劇情老土，甚至惹來前無綫女星李婉華批評，劇中一幕袁潔儀飾演的KK媽為錢而慫恿陳星妤（Yvette）飾演的阿女KK落火坑做舞女，怒指該劇情教壞人，更令王晶大動肝火隔空大罵！Yvette接受《成報》獨家專訪時，對該爭議劇情作出回應，大指代入該年代和角色，劇情十分合理且不老土。而她在最新一集吊威也扮享受一幕，一雙美腿搶盡焦點！
對於KK媽在劇中的「賣女」舉動，Yvette表示：「我自己就覺得身處現代當然唔合理，可能身處嗰個年代，我又覺得KK呢個女仔唯一可以咁快賺到錢而又不被玷污，其實在阿媽角度，特別佢做過舞小姐，咁代入返個角色，當然正常阿媽係唔會咁，但呢個阿媽係去到山窮水盡，又要照顧兩個小朋友。」
指街外人睇得太誇張
她續說：「我覺得短期做一段好短時間可以救急，佢想做舞小姐都唔係主動，所以嗰場戲KK都覺得好愕然，點解阿媽會叫我做舞小姐，所以佢（KK）都唔想去到叫生叫死，本來我（角色）都唔會做呢啲嘢，點知呀媽竟然OK！」Yvette認為劇情是發生在上世紀的舞小姐故事，劇情一點都不老土，並強調代入角色後劇情是無問題，反而是外面的人睇得太誇張。
另外，昨晚（5日）一集陳星妤要嘗吊威也拍戲滋味，樣子甜美的Yvette吊住威也飛來飛去，其中一個鏡頭她從高空降落，在上升氣流影響下，晒出無敵美腿，十足仙女下凡。不少網友大讚：「好有明星氣質」、「KK女神，最靚女」、「樣子甜美楚楚可憐想保護她，係初戀呀。」
期待參演古裝片
講到吊威也，Yvette受訪時透露今次並非第一次：「之前選港姐時都吊過一次，吊威也都幾驚架，但又要顧住個樣，因為要做到好Enjoy（享受）咁。」問到對拍古裝有否興趣？星妤笑言：「我好有興趣呀，自己都好期待將來可以參演古裝片。」
趙碩之惹網友同情
此外，劇集自播出以來深受內地網友歡迎，在微博關於「一舞傾城」的話題突破4億閱讀量。其中「#一舞傾城句句誅心#」的話題，內容是趙碩之飾演要獨力湊大仔仔的單親媽媽媚媚，眼見囝囝因自己的舞小姐身份慘受同學欺凌，遂以「媽咪唔係雞，媽媽係兔仔」氹番仔仔，這場戲令網友深受感動，成功勁吸逾7,700萬閱讀量。
|
搜尋新聞
