【本報記者報道】劉青雲、吳鎮宇及苗僑偉等昨天到尖沙嘴出席主演電影《談判專家》明星首映場，兩人自2005年《喜馬拉亞星》後，相隔19年再合作。兩人在放映前說：「唔係拍佢，就拍另一啲人，點知要等19年咁耐」，再敍首感覺一齊如舊。
問及對方參演是否成為接拍關鍵，青雲笑說：「唔係佢拍我都會拍！（鎮宇：要開飯嘛！）你估好多嘢撈呀？」

青雲透露，《談判專家》作為雙雄電影，兩人未有機會選自己的角色：「我就有！佢睇怕冇喇！其實冇，一早就講咗係咁。」吳鎮宇笑說：「我諗住做人質㗎！坐喺到就收錢喇！」

鎮宇仔想做導演 父有微言

兩位影帝合作，要承接《九龍城寨之圍城》聲勢，青雲又講笑：「希望唔好因為我哋而拉低返。」鎮宇對謝票亦有意見：「謝票係去多謝觀眾，要回饋fans嘅咩？基本上呢個方法係錯，唱埋歌要畀錢，算係商演嚟喇。古天樂謝票都唱埋歌咩？唔怪之得咁好票房！」

他們透露今次導演邱禮濤用新方式拍談判過程：「舊方法淨係拍我一個，再拍佢一個，然後剪埋一齊，今次就分兩個廠拍同一場戲，電話真係直接打通，可以有感覺知道佢仲喺電話隔離，多啲交流。」鎮宇說再合作唔夠喉，可以等下次，青雲則指夠晒數好滿意。

另外，鎮宇早前在嘟姐鄭裕玲節目中透露兒子Feynman想做導演，他昨天似乎仍有微言：「個個細個都亂噏，都有自己諗法。我叫佢唔好讀導演，想做導演唔一定要讀導演，因為導演成日失業。如果你有第二啲專科，你可以做吓裝修、美術設計，人應該有另一種學識，導演唔需要去讀，反而你有第二啲專業，對做導演都可以有幫助，我覺得齋讀導演好奇怪。」青雲就指Feynman與鎮宇不同，是帶有另一種幽默感。