「勁飛寶寶」轉配蘇兆輝，不容小覷。

【神祺小子／祺神】今次賽事八場草地兩場泥地，草地跑沙田C+3賽道，天氣突然忽冷忽熱，要留意馬匹臨場情緒，大汗馬可能會影響臨場發揮。

第一場五班1400米，「勁飛寶寶」落五班後三仗均有獎金，上場換上潘頓後即輕鬆取勝，今場要負頂磅上陣，上季亦曾試負重磅取勝，即使今場潘頓棄騎，但實在找不到另一匹對手比此駒更有勝算。
「明月昇輝」前仗同場大敗被問話，上場轉泥地又可馬上上名，相信今場未必會再安排此駒跟前，稍留直路衝一段或會更合此駒發揮，晨課蘇狄雄摸住，人馬上場亦證合拍。「易勝相吸」上場走外叠蝕位，雖然未到直路已開始乏力，今次轉沙田作賽難度會提高，但大摩手上低班馬，應會盡辦法交代，但今場最多爭位。「駕迅」今季轉倉後最叻跑第四，此程過往亦不時有走勢走入邊線，老馬三四選可拖一票。
第二場四班1000米，「遨遊戰士」操近四個月才上陣，上月開始由田泰安接手，近兩課大閘走勢非常吸引，此廐不少揀手貨一出即勝，希望此駒成為當中一員。「正本開心」上場一出負重磅即勝，姿勢尚有在手，今場負頂磅亦應不算太大考驗，三甲在望。「奇妙日」終於減夠分落四班，今季已兩次於三班直路賽以大冷身份走入第四名，相信此駒由今場開始會逐漸見真身，於四班必吼。「寶貝兒」暫時只於直路賽有過證明，上場排內檔關係稍難發揮，但馬匹本身亦有追勢，今場換上雷神，可以作配腳考慮。