【本報港聞部報道】黃子華棟篤笑最終在昨晚7時許售罄,黃子華透過經理人表示,感謝落力維持秩序的工作人員、保安,並慶幸公開發售門票的秩序良好。他又表示,知道有粉絲通宵排隊,除了感動,亦不忍心粉絲買飛如此辛苦。至於會否再加場,黃子華坦言,做一場棟篤笑需消耗大量體力並需要顧及聲線,暫時未有考慮再加場。
暫未有考慮再加場
黃子華表示,首先要感謝在售票處維持秩序的工作人員與保安:「喺唔同fans page同facebook,見到好多fans都分散排隊,好多都話呢幾日都有啲保安出嚟做登記,數下人頭。今次有關方面真係做咗好多嘢,所以聽到今(昨)日售票秩序維持良好,冇特別事發生,都好慶幸。」
他又說:「當日決定加場,犧牲休息時間,一次過推晒所有門票,根本冇諗、亦唔理係咪消化到,只係希望想睇騷嘅人,可以更多機會買到飛就得,所以有幾多推幾多。今(昨)日知道個售票情況,令我有『始料不及』嘅感覺。對於一班一早就去排隊、紮營買飛嘅觀眾,我真係好感動。見佢哋咁辛苦好唔忍心,慶幸知道今(昨)日好多人都可以買到飛。真係要再一次多謝一班維持秩序嘅工作人員。」
雖然反應熱烈,但黃子華表示,一場棟篤笑會消耗大量體力,又要顧及養聲,所以未考慮再加場。 |