組合Super Girls隊長Aka(趙慧珊)昨日到旺角舉行個人迷你演唱會,不少粉絲冒着紅雨捧場,令她十分感動,更說為了今次演出不停練歌:「我練歌練到把聲沙晒,所以都要適可而止。今日有啲粉絲由內地嚟,真係好感動,今日我全家人都嚟咗,感受到好多愛。」
焗甜品贈粉絲
Aka表示為報答大家支持,日前親手焗了甜品,送給在場的所有朋友:「因為復活節,所以想整蛋形,原來好難,我整咗100粒焗蛋白,之前經歷過幾次失敗,我保證今次好成功,食完一定唔會肚痛。」她笑言發現自己的廚藝不濟,要好好惡補。
另外,提到舊愛吳業坤前晩開騷,Aka表示因工作關係未能欣賞,大感可惜:「佢都有叫我,可惜我真係有嘢做去唔到,我都好想睇。(睇佢腹肌?)佢好勁,睇相見佢操到成身肌肉好犀利,我都好欣賞,佢靠節食同努力。」問到有沒有摸過吳業坤腹肌?她說:「我無摸過。(JW好猴擒。)係咩,個個都想摸。」Aka又稱自己都要加倍努力操肌。 <文>娛樂部 <攝影>梁迺枬