女子組合Super Girls成員Cheronna(吳嘉熙)前日舉行迷你音樂會,為新歌《無利可圖》獻出第一次!她坦言事前相當緊張,幸得家人和男友黃奕晨(Dixon)現身支持。今次她更榮升做創作人,跟陳考威、JNYBeatz共同作曲:「呢首係我第一首有份參與作曲嘅歌,真係好開心,無諗過自己可以去到呢一步,可以參與寫歌。『BB』(新歌)出世嘅時候,聽到自己嘅創作、見到作曲一欄有自己個名,真係覺得好開心、好感動,希望之後有多啲機會參與寫作。」
精選歌單
音樂會上她除獻唱自己的歌曲,也自選四首歌后級的作品:「呢個歌單我諗咗好耐,有邊啲歌係我好enjoy、又好想唱畀大家聽呢?另外幾首人哋作品都係中學時期成日聽嘅歌,每次唱都會覺得好陶醉,希望大家都鍾意。」
積極瘦身
提到父親及男友黃奕晨現身支持,Cheronna坦言相當開心:「我都有一段時間無出歌,同埋好耐無演出live show,之前《你的你》派台時有參加一啲live show表演,不過Daddy好多都miss咗。今次第一次表演《無利可圖》,仲要又唱又跳,對我嚟講好緊要,所以就叫Daddy嚟睇,可惜媽咪要做嘢嚟唔到,不過有一件好特別嘅事,就係Dixon之前話有工作,但最後都趕嚟支持我,所以成件事好有愛,所有支持我、愛我嘅人全部都喺度同我分享呢一刻,表演嘅時候知道佢哋喺度,我個心會好定,無咁緊張。」 她又透露近日積極瘦身:「之前太鍾意食嘢,所以肥咗好多,今次好堅決,同埋用好健康嘅方法去減肥,會Keep住做運動、練舞,加上媽咪煮健康餐,所以今次減肥旅程唔算辛苦。」 |