無綫藝人張頴康與太太麥雅緻及女兒,昨日到荃灣出席關注銀屑病患活動,患有銀屑病11年的張頴康表示,已經康復了九成半,最差的時候有七成皮膚出現皮屑問題,他說:「靠打針,透過生物製劑治療,但呢個病無得根治,要有好嘅健康、做運動、作息定時去長期作戰。」他指藥費也構成一定負擔,最初第一針花費五萬,隨後長期要打針治愈,慶幸後現時可以個半月才打一次針,花費五千,惟有在其他地方節省開支。
被誤會去滾
他透露以前因心情欠佳壓力大又日夜顛倒,令他發病:「以前我成日燶口燶面,又借酒消愁,有日起身落唔到床,好似中風咁,先知道自己有呢個病。」他指銀屑病是遺傳,當年剛與太太拍拖突然發病不能落床,更要召喚救護車入院,他說:「佢都問我係咪去滾呀?」 麥雅緻笑說:「當年資訊唔多,無接觸過呢個病,見佢啲皮膚出晒皮屑都驚㗎,醫生仲問佢生活檢唔檢點,後來睇專科皮膚醫生先證實係銀屑病。」 問到會否擔心銀屑病遺傳給兒女?麥雅緻直言懷孕時曾擔心:「因個病會遺傳畀男仔多啲,知道第二胎係仔時,都好擔心,不過佢話『我都頂到,咪一齊去面對囉』。」 |