歌手謝安琪(Kay)昨日出席兒童藝術活動,擁有一對可愛兒女的愛心媽媽Kay,即場與小朋友用模型車車轆畫畫,活動中分享了如何發展小朋友藝術潛能的經驗,以及與孩子之間一些有趣的親子活動。
講到女兒張靖快將一歲生日,Kay表示湊得比想像中輕鬆,因有經驗,又指女兒第二個月已經戒了夜奶,所以這一年全職湊她都沒問題。問到復出工作可會掛住小朋友?Kay說:「我未正式全面工作,做緊碟,但時間分配都充足。」
唔想再生B
問到可會打算追多個小朋友?她說:「好難,我覺得夠,同小朋友相處係講Quality,唔係多,依家生活好充實。」她又表示兒子張瞻好鍾意BB,她說:「佢直頭想我好似工廠咁,生好多佢都開心,啲小朋友嚟屋企,佢會送玩具收買佢哋。(老公想唔想你繼續做工廠?)唔會,因為佢知道生小朋友要經歷好多嘢。(咁你呢個工廠咪要休息?)係呀,暫時,其實呢個年紀都無㗎喇,要榮休,光榮結業,我依家41歲,下半場啱啱開始,做媽媽得心應手,但事業就想試多啲。」
講到老公張繼聰經常黐女兒,問她可有呷醋?她表示不會,其實女兒都黐她,兒子都是黐她多些。
兒女黐媽媽
問到張繼聰出活動時表示女兒黐他多些,是否認叻,Kay即笑說:「係藝術,語言藝術,最高境界就係自己呃到自己,佢好少喺屋企,佢喺屋企地位無謂講,但我哋好欣賞佢辛勤工作。(佢之前話用咗一年來經營父女戀?)其實兩個小朋友好鍾意黐我,但佢會吹噓到好似喺屋企好緊要,彌補心靈空虛。」 |