世界真細小!這個詞語形容在蔡卓妍(阿Sa)身上最適合不過,因為近日身在俄羅斯的阿Sa,竟然在當地碰上謝霆鋒,因阿Sa及容祖兒在俄羅斯睇波,在當地超著名地標聖巴素大教堂外擺好pose打卡的時候,就畀霆鋒亂入。阿Sa在社交網上載了幾張街頭留影照,竟然有個人亂入鏡頭,還舉起V字手勢間接與阿Sa合照。睇真啲,原來正是謝霆鋒。阿Sa都覺得不可思議,立即與霆鋒正正經經影番張合照。阿Sa留言:「真係咁啱得咁橋喺條街度撞到。」
而祖兒亦不輸蝕,在社交網擺上阿Sa、霆鋒及老闆楊受成的合照,還留言:「喺香港都未必咁齊人。」至於一度傳出分手的師兄劉浩龍,就跟明星足球隊睇波,同樣身處俄羅斯,不知兩人有沒有機會撞見呢?