阿嬌接受主播許文軒訪問，大談嫁作人妻的感受。

日前鍾欣潼（阿嬌）作客TVB娛樂新聞台節目《StarTalk》，接受主播許文軒專訪，大談相隔四年推出國語新碟及嫁作人妻感受。阿嬌說：「我覺得自己啲國語好咗，好開心，老爺話我有進步，啲口音無咗。不過今次錄音都難，因為有啲歌曲風格變咗，好似《幸福出發》就要唱得甜甜，真係未試過，把聲自己都認唔到，希望將幸福同人分享。」

難忘玩跳傘

談到另一半，阿嬌直言剛與對方拍拖一周年：「都算閃婚，其實係我之前去台灣拍戲時，信樂團嘅阿信同女友介紹畀我識，嗰時佢成日嚟探我，我哋有共同嘅興趣，就係睇綜藝節目，我哋好鍾意睇《非誠勿擾》。」問到另一半為自己做過最冧事情時，她說：「去夏威夷旅行玩跳傘，不過佢畏高，佢本身無諗過同我一齊跳，但佢怕我中途有咩事，所以最終決定一齊跳，我睇返啲片，佢個樣真係好好笑，不過真係好感動。另外，佢又成日都會book啲餐廳同我食飯，我亦想打扮得靚靚去，但我唔識化妝，唔識畫眼線，通常等到餐廳閂門我都未化好，搞到佢都嬲嬲哋。」

新居找尋中

對於二人屬異地戀，阿嬌說：「佢願意維繫呢段感情，佢成日都飛過嚟香港陪我，（有無諗過去台灣住？）我哋仲搵緊地方，其實婚後會繼續拍戲同唱歌，佢都有叫過我唔使做會照顧我，不過我覺得結咗婚係要做嘢，我唔想倚賴。婚後始終要有個家，要生BB，不過唔會係呢兩年嘅計劃，生小朋友無壓力，因為一有壓力就生唔到，睇緣分。」