踏入新一年,古巨基可謂喜事重重,1月發布的新歌《亂世情侶》,短短兩星期已經於YouTube得到過百萬點擊,大受樂迷讚賞,4月於紅館舉行《古巨基「我們」世界巡迴演唱會香港站Part 2》三場火速爆滿,場地檔期所限決定終極加開最後一場,門票於下星期三公開發售。另外,基仔和定欣看到粉絲留言提議為《亂世情侶》做合唱版,於是MV女主角定欣與基仔決定給粉絲們一個驚喜,一起入錄音室錄製了《亂世情侶》合唱版,於昨日情人節送給大家,祝願世上所有情人都可以開花結果。
炮製情人節甜品
前日基仔及定欣為宣傳這首合唱新歌而拍攝《東將西望》,即場表演整情人節甜品:梳乎厘pancake,沒想到買來用的半打雞蛋,隻隻蛋打出來也是雙黃,令基仔定欣兩人驚訝大叫連連:「真係好事成雙係咁出現,連打咁多隻蛋都係雙黃,真係正呀。」兩人雞手鴨腳邊訪問邊整pancake,當中笑料百出。
幾乎唔使睇歌詞
談到兩人為甚麼會有今次合唱決定,基仔表示是歌迷提議,結果好短時間內決定合唱版。問到定欣入錄音室錄歌有無困難?基仔就搶答大讚定欣非常之唱得:「佢真係唱得好好!錄音個日好快好順利就已經錄起隻歌,佢唔單止唱得好,勁到連和音佢都親自唱埋!」
定欣就話:「可能我之前拍咗個MV,聽到熟晒首歌,之後我又不停翻睇個MV,所以入到錄音室係幾乎唔使睇歌詞,已經唱到。個人已經代入咗落個故事角色裏面,所以唱個陣感情好易就投放晒落去。你問我比自己幾多分,我唔知,盡咗力去做,希望大家鍾意啦。」