【本報記者報道】無綫視帝馬國明（馬明）、黃嘉樂和趙璧渝等人主演的無綫劇《法言人》，大結局收視率錄得25.3%，而myTV SUPER 7天跨平台總直播點擊率約440萬，成績驕人。觀眾大讚劇集做足法律功課，非常好睇！所以台前幕後昨日（24日）於將軍澳電視城舉行祝捷會報喜。有份出席的馬明對劇集收視佳兼口碑好表示鬆一口氣；而正在拍攝新劇《新聞女王》的他，雖然形容拍攝過程都挺辛苦，但就十分享受跟視后佘詩曼鬥戲。
正在趕拍新劇《新聞女王》的馬明，雖然對《法言人》收視報捷表現雀躍，但在祝捷會上仍顯疲態。對於《法》劇開播前，接二連三播出他有份主演的劇集，馬明曾一度擔心被觀眾睇厭自己，最終被封「收視福將」，他謙虛表示：「福將就唔講得，我覺得自己好運，觀眾鍾意睇我演嘅戲我覺得好開心。坦白講，香港人已經改變晒睇劇模式，佢哋而家係得閒先上網追睇番，所以有咁好成績我係覺得好驚喜。」
爆佘詩曼請劇組萬歲
提到他趕拍的《新聞女王》，他透露因為現時主要拍攝新聞部的廠景，所以拍得十分辛苦，他坦言：「每日而家得返3、4個鐘時間可以休息，好彩都就嚟完成，我撐多幾日完咗呢個部分就唔使咁甘喇！（享受跟佘詩曼鬥戲？）梗係啦！佢係一個非常好嘅對手，佢好照顧我哋一班演員，之後仲萬歲請大家食嘢。（套劇幾時播？）我自己都唔清楚，部劇應該拍到下個月中，因為呢套係合拍劇，所以唔係公司可以決定，大家都未知幾時播出。
黃嘉樂趙璧渝感動到喊
另外，出席的黃嘉樂和趙璧渝在祝捷會上邊講邉喊，十分激動。他感謝監製劉家豪給予他發揮機會，趙璧渝則表示沒想過自己可以有這麼多戲份，所以拍攝時都很大壓力，亦擔心自己表現不好。對於在台上激動灑淚，嘉樂笑指被趙璧渝影響，趙璧渝則表示：「佢頭先咁真誠，完全觸動咗我，套劇有呢個成績，我每次講起就想喊。」
|
搜尋新聞
