【大鐵論馬／大鐵】周三晚兩場四班1650米加埋只得十七隻馬報名，遠遠不及其餘短途拆組賽事熱鬧。其中一場正是第一口孖T頭關，馬匹實力相對參差不齊，「肥仔威威」可以作重心選擇，馬兒雖然至今未曾贏馬，但是上季有三次能夠上名，而且當中難度不少，439場次當晚場地以前置馬較為有利，馬兒最後直路交出全組最快的末段時間力追頭馬，可惜仍以半個馬位負於賺了形勢的「萬利高」，同時亦壓倒稍後有出色表現的一眾強手跑第二，這場賽事絕對可以做實力指標。雖然其後馬兒未能補中，不過兩次都有藉口敗不足惜，今場對手相對較弱，部分馬匹甚至乎只有五班頭馬水準，所以率先作為重心。其餘選擇先揀有班底的「韻妙星」，雖然狀態麻麻，不過曾經在三班贏過，今場可以食下班底。再選霍利時另一匹「力王」，西班牙馬上季失望，不過在快活谷每次出賽都肯追，預留一席。最後搏下隻「龍城銳將」脫變，今季已有多匹南非馬跑出，呢隻一級賽後裔今次初跑快活谷，確實帶來一份神秘感，早前試閘走勢比之前規矩，值得期待。

尾關雖然出馬比較多，但是選擇上都離不開那幾隻重心，「極爽」、「陽明滿滿」以及「雷電寶」上季都贏過同程，率先留意。暑期跟進馬「愛添滿」終於跑返谷草1200米，二班曾經跑入獎金，呢匹滿利谷三級賽冠軍在四班應該有表現。最後兼顧埋「二話不說」，上季直路賽爆冷嗰場水準都高，今次賽前從化閘表現有驚喜，十一檔希望雷神可以克服。