「有錢分」(外)今季表現脫胎換骨，今次原班再戰可

【大鐵論馬／大鐵】今次三T有少量累積多寶，觀乎排位三場賽事其實不算太複雜，或可試下刀仔鋸大樹。頭關第四場四班1400米賽事，預計步速會比較慢，「有錢分」今次抽到四檔或會比過去兩仗跟得更前，以免又再輸蝕步速形勢，此馬今季踏入5歲陣上表現脫胎換骨，今季首次上陣沿途三叠，以往若有此情況基本上已經輸了九成，但是馬兒不但沒有搶口，直路上更加交出全組唯一23秒以下末段時間輕鬆贏馬，力壓後來二連勝的「承你所願」，技驚四座。再出一場可惜同樣抽到中外檔，早段又再被頂出外叠望空，沿途輸蝕形勢以及步速之下，最後跑返個第二已經收貨。今次再報同程面對的主要對手不是是老弱殘兵就是抽到不好檔位的尺寸馬，比較當銳的「有錢分」就如虎入羊群，放題開餐。

配腳方面，「環翠戰士」此程較為準繩，今季可降四班起步比較有利，賽前工夫沒有馬虎，試兩課大閘輕舒步頭，跟跑有力，以往在四班經常接近，重磅都有權走入三甲，率性兼顧。9歲老馬「歡樂小子」落班後重回曾被禁賽的跑馬地夜賽跟跑一場，走勢明顯比之前在三班接近，如有神助抽到一檔，再加上今次用到潘頓相信盡力一煲，光榮退役。最後兼顧質新馬匹「中神通」，馬兒雖然只屬三歲北半球馬，但是蔡約翰旗下的馬匹經常進步神速，情況就如上季「多多」早期一樣，馬匹跑姿非常不規矩，但不排除內檔慳位再加上雷神騎功搭夠之下，憑著馬兒本身質素失驚無神嚇你一驚跑入一席，長遠來說應該屬於泥地一哩好手。