蔡約翰（左）上季超過一半頭馬來自大熱門馬。

「旺蝦王」剛季曾以1.2倍掄元。

「以奇用兵」上季元旦日以1.3倍熱食。

蔡約翰（左）上季超過一半頭馬來自大熱門馬。

【本報訊】馬季裏面，不時有馬迷討論邊位練馬師的大熱門好穩陣，邊個馬房的大熱門成日輸，不過由於當時馬季仍然在進行中，數據不時有變，現時既然已經唞暑，一切數據塵埃落定，係時候替各馬房翻查舊帳，找出大熱門保衛者。

最熱1.2倍旺蝦王
印象中，蔡廐大熱門成績突出，現實中，亦係一樣，上季蔡廐馬共有107次被捧成大熱門，取得46冠19亞12季30負，勝出率逾四成，上名率逾七成，當中包括1.2倍「旺蝦王」，以及1.3倍「以奇用兵」，雖然長捧未必有錢贏，但用來做膽的話，收錢的機會相當不俗，所以大熱門保衛者之名，蔡約翰的確係實至名歸。

容廐大熱一半勝出
中游馬房方面，容廐馬剛季共20次被捧成大熱門，取得10冠3亞，勝出率剛好一半，入Q率更達六成半，當中最熱係1.9倍「平湖之星」，以及2.0倍「幸運興隆」。

霍利時成績最差
講完邊個馬房的大熱門最穩陣，當然要留意埋邊個馬房的大熱門成績最差，新一季識得避開不穩大熱門，隨時收錢收到手軟。講到上季大熱門成績最差，相信霍利時認第二，都無乜邊位練者夠膽認第一，事關霍廐馬上季曾經23次被捧成大熱門，但只錄得2冠3亞9季9負，勝出率連一成都冇，慶幸上名率約六成，但當中季軍次數偏多，反映此廐大熱門相當不穩。