【掌握大局／蔣偉權】今日沙田賽事由於颱風關係已經取消，馬會更決定安排在12月29日進行補賽，當日其實係拆禮日賽事，以及元旦賽日之間五日空白期的中間點，安排於當日補賽，雖然賽期不會過於頻密，但亦會引發出一些問題。

外籍騎練多旅遊充電
首先，外籍人士對於聖誕假期一向相當重視，不少騎練都會安排聖誕期間出外旅行充電，聖誕過後補賽，練馬師未必會更改行程提早回港，遙遠控制廐務，有副練代為打點一切，相信影響不會太大，只係馬主們如果想在沙圈與練者傾幾句，則要改為傾電話，或者降格與副練商議軍情，在階級觀念濃厚的馬場內，此舉可能令到部分馬主感到不是味兒。

引發騎師荒危機
其次，原本部署出外旅遊的騎師，未必會樂於取消行程，根據過去的經驗，部分外籍騎師甚至會在被罰停賽之後，安排在聖誕期間執行，可以寓停賽於旅遊，的確是一件樂事，過去亦曾經在聖誕期間出現小型的騎師荒，到底情況會否在今個補賽期重現，現時只係言之尚早，畢竟仍然有三個多月時間給馬會作部署，或者到時安排多兩三位騎師短暫客串，可以解決到問題亦未可料。