「佳運來」（左）轉廐後贏田草1600米。

【風花雪月／子樂】噚日三點半馬會宣布賽事取消，好似係幾明智且敏捷嘅做法，但事實又係咪呢？樂仔覺得睇吓你哋係咩身份囉，如果純粹係馬迷，咁當然飲得杯落啦，完全唔使破費再買馬經，又唔使再度馬，一於放自己假，暫時放低鬥志，可以唞吓。
但係作為馬經從業員，噚日就O嘴，叫苦連天，三點幾叫停，事前工夫做好晒，寫好嘅稿，整好嘅版呀，全部作廢，呢次真係白做，遲唔取消，早唔取消，係要等到晏晝，點解唔提早啲，等啲早出街嘅馬經唔使做，無謂累人累物，費時失事。
所以有時馬會都幾自我風格，唔會點理會賽馬媒體，但冇法子啦，人哋口大，你口細，邊會有say呢，唯有啞忍，投注額高企之時，邊會理得咁多，又唔關佢哋事，白做係你哋之嘛。

佳運來破格贏一哩
講番馬事，上個禮拜日，石哥隻「佳運來」爆出24倍冷門，呢匹馬四班有着數，本來贏馬唔係奇，奇就奇在喺田草1600米，過去咁多年，跑過1600米九次咁多，得兩場跑到第四，好多時係十名過外，勢估唔到呢鋪一轉倉即刻贏1600米，有時真係唔到我哋唔信，運氣嘅嘢，有就有，冇就冇。