【本報記者報道】於今年元旦宣佈訂婚的49歲無綫視帝馬國明（馬明）與其36歲未來老婆湯洛雯（靚湯），昨日（31日）首度以準新人身份一起出席珠寶品牌活動。將於今年成婚的2人，以米色系列禮服示人，出場時更情深翹手，之後又不停向傳媒大送心心，如同預演婚禮一樣！二人受訪時對答更甜到入心，馬明甚至冧爆表示，婚禮交由未來老婆全權話事，極寵靚湯！
正在籌備婚禮的兩人，被現場傳媒笑指他們如同進行婚禮一樣，大會更送上逾3両重的龍鳳鈪給他們，作為賀他們的結婚禮物，有金又有心！2人以準新人姿態賺外快，接受傳媒訪問時顯得恩愛甜蜜，準馬太靚湯謂︰「大會想著淺色衫，今日呢套衫係咪好靚？（係咪你夢想穿著的婚紗？）其實我未揀婚紗，哈哈！」被問到正式婚紗會否比現在穿的更性感，靚湯謂將性感尺度交給馬明話事，馬明笑笑口話OK。
2人透露正在努力儲錢築愛巢，物色一個真正屬於兩夫妻的私人空間，靚湯表示︰「而家大家都儲錢，想買返一個屬於自己安樂窩。（有冇目標？）無呀，儲多啲咪買大啲，最重要係能力範圍內。」馬明又指如日後計劃生小朋友就可能要更大，最好住所位置近父母一點，日後兩公婆要工作時，小朋友都有人照顧。
等馬明有期影婚照
雖然近日馬明忙於新劇《新聞女王》的廠景拍攝，靚湯早前都揚言要等馬明有期，兩人才可飛到外國影婚紗相，現時只好積極修身，等馬明時間允許就馬上飛！不過籌備婚禮過程繁複瑣碎，馬明都指當自己一有時間就會幫忙參與。靚湯就錫住眼前的未來老公，表示最緊要開開心心無壓力，明白他賺錢辛苦，加上拍攝《新》劇時每日只有2、3粒鐘補眠，所以她也不介意自己處理。
婚禮地點日期保密
2人婚禮相信會定於海外舉行，不過對於日期和地點，馬明與靚湯保持神秘。唯一透露的是未必會有兄弟姊妹團，靚湯說︰「可能只係伴郎伴娘簡單啲，婚禮小型啲。」馬明就補充︰「外地搞嗰個會係簡單啲。（咁香港補辦婚禮先大宴親朋？）香港補辦婚宴，而家暫時從長計議。」
|
搜尋新聞
