[桐言桐語/B女]唔知大家有冇聽過VR呢？中文意思係虛擬實景。話說幾日前，有位好友就帶咗小妹去見識，玩嘅時候需要帶著VR眼鏡同拎起道具槍，去感受虛擬實景，而當日我哋玩嘅第一個遊戲係用槍射紙牌喪屍，去到第二個遊戲就係分團隊戰，要射擊唔係自己隊友嘅玩家，都幾刺激，去到第三個遊戲就係緊張，要射擊真喪屍，今次唔係紙牌，真係識郁同爬，遊戲未開始我已經好驚同緊張，要三個人一齊玩，好記得啲喪屍不停岀現，仲要行到勁接近，之後我就開始嗌，因為太真實同好驚，最後雖然輸咗，但印象深刻。

睇返今日頭場五班1000米，我就鍾意匹「漸信龍駒」，呢匹馬今季跑過四次，雖然成績唔太理想，但今仗第一次跑五班谷草，而且減分，狀態亦開始大勇，所以對佢有利，再睇返過往紀錄，佢跑草地嘅成績亦比較好，另外，今場佢嘅對手唔算太強，只要鞍上人發揮得淋漓盡致，就有機會同佢贏馬開齋。

到第七場四班1650米，我就揀咗「創紀錄」做心水，佢出道以嚟每次都係大冷門身份出賽，但今季三仗佢都表現得唔錯，對上兩仗都展現出幾好嘅追勢，特別係上仗，佢只不過拍住「爆騷」過終點，「爆騷」喺啱啱國際賽日差啲補中，證明佢嘅狀態漸漸到位，唯一顧慮係初跑谷草，但睇返血統，佢嘅同父馬大部份都應付到谷草，今仗「創紀錄」應該有賠率，值得一博。