[任勝之言/黑豹]第五場有個得意情況出現，好多前領或跟前馬匹都抽到中外擋，估計出閘後頭四百會鬥攝好位，其中預計熱門的「好好學習」極不幸地抽中十二檔，形勢相當困難，排十檔同十一檔的「金剛之星」、「劍追風」都是前領型，如「好好學習」不幸全程在外競逐，被燒死或蝕位無數機會甚高，如真嬴出證明大超班，往後大把機會再追。
「翡翠劇院」一年一度燕歸來，每次配上潘頓，都能交出成績，今場找回潘頓，應是燕歸來的時候了，今場估計步速會偏快，甚至有鬥燒情況出現，故更有利此駒發揮，一於此駒做膽吧。
「銀紙」評分其實開始欠利，但今次有運到抽到黃金檔位，可慳回不少氣力，加埋配上蘇兆輝，戰意必盛，預計三甲甚高，一於拖埋。「首飾大聖」近仗跑谷草都欠睇頭，但今場回配雷神及預計步速偏快情況下，有能力追回一席，合理配腳。