【本報記者報道】由王心慰（Amy姐）監製的無綫新劇《隱門》，昨晚（29日）正式首播，故事圍繞吳岱融（Hugo）飾演的十惡不赦的賊王葉嘯天，如何影響黃智雯（Mandy）飾演他的女兒張心月一生。劇集開播前，Mandy已經不斷大呻拍攝期間日日崩潰，全因Mandy日日幾乎要上演被吳岱融虐打的戲份，也令劇集宣傳核心也落在大狠角吳岱融身上，原來他在劇中狠到會咬甩人耳仔，鏡頭甚至過於血腥已不能播出街。
繼《巨輪II》及《黄金有罪》，Hugo與Amy姐今次是第三度合作；談到之前二人攜手打造的「鷲哥」（《巨輪II》角色）憑「賤得嚟有型」爆紅，「鷲哥」的「臭雞」金句更是傳誦至今，Amy姐笑言今次是專誠為Hugo度身訂造葉嘯天一角，又大讚Hugo是次爆Seed程度直達天花板境界。
Amy姐說：「之前佢拍《巨輪II》，我喺現場睇已經覺得佢表現超出我預期，然後我一直覺得佢有潛質再爆上去。」昨日（29日）無綫發佈一條以葉嘯天「狠樣」及「暴行」為主打的預熱宣傳片，除可一睹吳岱融各式各樣的狠樣，還能率先睇葉嘯天虐待張心月過程，包括箍頸、撼頭埋牆及連環掌摑等。
目露凶光 展現勁爆狠樣
其中一幕葉嘯天服刑期間發狂咬甩囚犯耳仔一幕，據知更因尺度問題出街前決定剪掉；雖然如此，Hugo目露凶光兼青筋盡露的勁爆狠樣，已足以令觀眾入戲。Hugo受訪時，坦言是次飾演葉嘯天辛苦之餘亦大壓力：「成日要將個轉數Tune到好高，同埋真係打得比較多，所以有啲壓力，自己演繹呢個角色好多時係扯到行晒，好似睇咩都唔妥咁，係好玩嘅，但亦真係需要大量體力。」
兒子親赴現場 幫手拍劇照
Hugo又指葉嘯天與「鷲哥」大有不同：「高天鷲係有錢嘅惡人，葉嘯天係冇錢嘅惡人，因為冇錢佢發晒癲、不擇手段，仲要好喪。」Hugo透露最難忘場口是臨尾險遭陳展鵬活埋，並透露拍攝時雖然辛苦，但當見到愛兒在現場為自己認真拍攝劇照時，頓時暖在心頭。
談到應付大量動作場面，Hugo笑言全靠平時有鍛煉體能，以及監製Amy姐貼心安排：「我一路以嚟有踢波同Keep住1小時慢跑，仲會拉筋，拍嘢時又會做多啲按摩咁。同埋Amy姐好體恤，搵咗個60幾歲嘅替身畀我，等我有機會抖吓。」
|
搜尋新聞
