前無綫高層余詠珊離巢無綫後，近日過檔HOY TV炮製了不少新節目，其中包括撮合七仙羽師傅和歐陽偉豪（Ben Sir），找2人以「Ben七」組合做生招牌，再加入前《東張西望》性感女神林泳淘、林希靈等，開拍防詐騙資訊節目《東呃西騙》，節目9月首播。昨日（30日）節目進行拜神活動，七師傅接受《成報》訪問表示：「我會喺節目做裸聊主角，不過係教觀眾防騙資訊。」

採訪、攝影：黎永樂

新節目《東呃西騙》以獨特角度拆解各式各樣的騙案類型。除了講述五花八門的騙案外，更會加入個案重演的部份，但昨日電視台邀請傳媒參觀的拍攝現場，現場似足無綫《東張西望》廠景，節目名及錄影廠都疑似抽《東張》水，不過出席活動的Ben Sir向現場傳媒表示：「有比較有傷害。」並指「東西」二字其實好普遍，各台有各做法。

林泳淘不覺抽《東張》水

至於著得十分性感現身的前東張女神林泳淘接受《成報》訪問時，預告今次會收起性感，主力教人防騙，她表示：「我哋除咗做主持之外，我哋會做唔同角色，類似案件重演，（會否同拍《東張》一樣小背心上陣？）冇呀冇呀！我仲要著多幾件衫，因為個廠太凍喇！哈哈哈！」她透露頭幾集會推出有關「假和尚」和「假專業人士」的騙案重演。

問她有無試過生活中遇騙？泳淘笑說：「呢度囉！哈哈！本來節目都唔係呢個名，但一見個廠景同節目名。哈哈。（抽《東張》水？）唔覺，我有問監製嘅，我哋有我哋構思。」

善信遇情騙損失過百萬

另外，七師傅接受《成報》訪問時表示，今次是首次拍資訊性節目，要做主播又要扮騙子，無人教我哋演戲，全部要自己執生。（你同Ben sir扮乜？）扮假和尚啦、扮特務，仲要扮裸聊做色情騙子啦！」她指並非有裸露鏡頭，只是用甜言蜜語勾引人，基本網上大部份騙案都有做過。她又為節目解畫：「其實節目冇抄《東張西望》，監製其實兩年前已經想做呢個節目，科技進步咗但更多人被騙，主要我哋提醒觀眾要慎防騙局。

問七師傅平時試過遇騙局嗎？精明的她指自己是個不貪心的人，做事不會衝動，會去想事情是否合理，她又說：「好多善信每日都有同我分享佢哋被人呃嘅經驗，聽得多就有經驗如何避免。（佢哋點被騙？）好多女信眾因為社會男少女多，年紀又大，拍唔到拖，所以一有人關心同噓寒問暖就會好容易感動，就會上當，試過被呃幾百萬都有。

她續指男信眾也衰貪心就容易墜入圈套。