李靖筠填詞爆老細是人類最大公敵。

【本報記者報道】女歌手李靖筠（Gladys）新歌《苛刻》昨日（1日）上架，這次Gladys亦參與作曲部份和rap詞部份，這更是她首次填詞的作品。出道以來，Gladys參與過不少自己作品的創作，大部份以作曲為主，這次她初試啼聲，首次填詞，而且更是英文rap詞，對她來說絕對是挑戰。

Gladys說：「本身對文字比較弱，所以好少寫字，唔好話英文，其實中文英文，所有文我都係第一次填。我覺得寫rap係好玩啲，因為其實食拍子，唔駛食音，當然英文亦都再容易啲。自己都聽好多呢類型嘅歌，譬如有啲我好鍾意嘅rapper，我會覺得佢啲詞寫得好好，會聽超級多攞靈感，或者睇吓人哋點樣寫。」

不過原來一開始Gladys並沒有打算自己填詞，「但係諗極都諗唔到搵邊個寫，諗吓諗吓已經嚟到錄音前兩日，哈哈，大鑊！咁唔係我自己寫都唔得啦，我諗最大嘅困難就係勇氣。」

Gladys錄音時亦花上不少時間，因為這次歌曲與她以往的曲風及唱腔均大不同，至於題材方面則來自Gladys日常生活的所見所聞，而職場上遇到的種種，更是大部份打工仔茶餘飯後的話題，她寫完demo後表示：「覺得首歌係比較襯一啲憤怒啲嘅詞，我就喺度諗，其實平時人類最大嘅公敵就係你老細，永遠出街食飯隔離枱一定係投訴啲老細，即係你淨係鍾意你份人工，唔鍾意你份工。我就覺得，好似大家共同嘅憤怒對象係你公司時，不如寫一啲關於咁樣嘅歌。」