【本報記者報道】無綫電視劇集《逆天奇案 2》熱播，收視節節上升，劇情十分緊湊。幕後拍攝同樣精彩，眾演員就互相「出賣」互爆大家拍攝時搞笑一面，陳展鵬就大爆林夏薇拍到腳震的一幕。
陳展鵬與林夏薇這一對究竟可否破鏡重圓？觀眾都期待林夏薇原諒第三者馮盈盈之外，亦能重新接受陳展鵬。其中一幕陳展鵬約林夏薇見面希望表白想復合卻被拒絕，觀眾有共鳴感到心酸，原來背後拍這一幕認真辛酸，因為要步行超過1000級樓梯在一棵大樹旁拍攝，除了行到氣咳，陳展鵬大爆一向都有運動嘅薇薇，當日都行到腳震震。
行雷閃電步行千級樓梯心驚驚
林夏薇笑談「腳震事件」時說：「當日更是黑雨警告，大家都冒住畀雷劈嘅危險去拍，唔係講笑，真的有個雷兜頭劈下來，等了幾小時才稍為雨停了，爭取時間步行超過1000級樓梯上去，拍完再趕快落樓梯，驚又再行雷閃電，這個人（陳展鵬）就在笑我是否落樓梯腳在震，我的確是控制不到肌肉，因為腳好攰，不停在顫抖，被他發現了，常拿來取笑我。」
張穎康「最疏扶」 埋位前練高球
全劇「最疏扶」的主角，他們都說非張穎康莫屬，經常都偷閒練高爾夫球。張穎康笑說：「我這個精神病人，在監獄裏面，又不用化妝及梳頭，我在等大家埋位有好多時間嘛，又對住成個草地，既然我車尾長期有兩枝高爾夫球棍，就當然利用一下時間練習啦，點知俾工作人員拍低咗視頻，話我真的似足精神病人，所以這個角色不用培養情緒，我一嚟就入戲。」
黃智賢(Ben)與蔣祖曼(Joeman)這一對，幕前就甜蜜溫馨，但Joeman說要爆料，原來阿Ben是開籠雀，她說：「阿Ben一日到黑，只要未埋位前就唱歌，表演慾非常強，有時拍到半夜突然傳來午夜歌聲，佢話可以令大家唔眼瞓，不過佢真係唱得好好聽，更俾我偷拍到他，我成日都問佢幾時帶我去登台。」
黃智賢最鐘意午夜唱歌撐眼瞓
阿Ben亦讚 Joeman 都唱得好好聽，原本《逆天》首輯之後都想一齊情侶檔登台，可惜遇上疫情，但機會留俾有準備的人，他就是等機會再孖住一齊去唱歌。Joeman 即說：「有好多首本歌，隨時都可以配合，我都好想掘金呀。」阿Ben笑言：「我哋去到邊度都係好拍檔呀! 」
另一方面，相隔26年再拍無綫劇的梁小冰終於登場，她在劇中飾演的阿蘭因歷盡不幸，令樣子看上去比真實年紀大很多，40多歲的年紀不但已滿頭白髮，同時亦滿面皺紋，比起現實中已年屆54歲的靚靚小冰樣子更要老一截，令網民大嘆造型有驚喜！
小冰受訪時坦言，一口答應監製邀請演出，全因角度夠晒高難度。小冰說：「唔經唔覺都主演咗50幾部作品，作為演員梗係想所有角色都演吓，呢個角色好有挑戰性，大家都會諗我會演CEO高層呢啲角色，呢個角色無論遭遇同造型都夠晒估唔到。」
談到老妝上妝過程，小冰笑言不足半小時便完成：「化靚妝就要個半鐘，化醜妝只需半個鐘，因為化妝師好犀利，佢哋擺咗半打架生喺枱，一嚟就不停係咁噴，之後再逐條逐條將頭髮畫白，最緊要係夠大刀闊斧。」
小冰說，由於監製想於劇集播出前盡量保密「老妝」造型，故小冰為了配合保密也花了不少心力：「好似我化咗妝後有好多演員要求合照，我都要諗好多原因去拒絕，因為唔想曝光個妝，造型一曝咗光就會令到觀眾冇晒驚喜。」
小冰又大爆為了角色刻意減磅：「我喺2023年1月最高峰（體重）係132磅，其實我本身都想減肥嘅，點知家豪哥同志江打電話嚟邀請我，令我更加有動力去減。拍攝嗰陣我減到116磅左右，我依家就已經減到104磅，簡直係重生一樣！」小冰大嘆Baby Fat搞到「襟老唔襟瘦」：「就算我瘦到成條藤咁，塊面都係肥肥地，要去到參選時93磅嗰陣先會睇落係瘦。」 |
您可能有興趣:
|
搜尋新聞
