文、摄/ ALFRED
早排天气又湿又焗,咪成日饮冻饮啰,饮到肠胃唔好口又臭面又灰,我个中医老婆当然唔会放过任何踩我既机会啦:「你暑湿呀,人又肥又肿又口臭,饮一个星期冬瓜薏米水啦,如果唔係执一个星期药你食…….。」
「第一,我真係好怕中药;第二,冬瓜薏米水乜都唔加真係好寡架老细。」
「加只鸡得唔得呀?」
「嘻,你有本事煲到无油咪得啰。」
「老婆,我想话你知你老公係唔大得㗎。」
冬瓜薏米炖鲜鸡羊肚菌
羊肚菌:性平、味甘,具有益肠胃、消化助食、化痰理气、补肾、壮阳、补脑、提神之功能,对脾胃虚弱、消化不良、痰多气短、头晕失眠有良好的治疗作用,其实羊肚菌同鸡油係好朋友,佢超级索油,而索满鸡油既羊肚菌係可以好食到我放弃减肥,只要一些小小秘技,隔些少面层既油就可以神不知鬼不觉,你有你饮靓汤,我有我食邪恶靓菌啦喂。
材料:
1. 冬瓜一圈,去皮去籽
2. 鲜鸡一只,飞水索干加半茶匙盐搽匀全身,闲置30分钟
3. 羊肚菌10只,温水浸2小时,压干水备用
4. 薏米1钱
5. 姜一小片
做法:
1. 将羊肚菌全数放入鸡肚内,用牙籤将鸡尾密封
2. 冬瓜先放入炖窝,再放薏米
3. 最后将原只鲜鸡放入,加2.5升大滚水
4. 隔水蒸3.5分钟
5. 小心取出鲜鸡放碟上,拿走牙籤,开膛即可食用,鸡肉嫩滑,羊肚菌香浓
6. 汤面少不免有少许油脂,轻轻用隔油匙隔走便成
註:此菜只可用炖,否则冬瓜燶底,鸡油四溢就过不到关了
|