【本報記者報道】郭富城、任賢齊（小齊）和林家棟昨天（3日）到將軍澳一間學校出席賀歲電影《臨時劫案》記者會。飾演的士司機的家棟揸紅的載兩位拍擋登場，又與扮財神的符家浚一齊派利是、派揮春畀現場長者。小齊和城城同為歌手，相識多年，卻是首度合作拍戲，感到開心又興奮。
城城除了導演設定的一對「摔跤耳」，還有很出眾的哨牙：「我一睇完劇本就覺得角色應該要係哨牙，即刻同美指文念中一齊去訂造假牙。 」戴住假牙演出充滿挑戰，因為講嘢用力會成副假牙飛走，又會多咗機會噴口水，對手就最難受，家棟直認：「真係食過佢啲口水！」
城城「哨牙」造型 常噴口水
家棟今次演的士司機，沒有被記者的士起標價考起，亦知道的士團體申請加價，又搞gag說：「我有做『阿爸』架！烏烏烏嗰種！」他指今次角色屬於「笠水」型：「又要威又戴頭盔，俾人打就即刻縮。」城城以兩個字形容，「廢中！」小齊就說同是「廢中之人」，不過這位「廢人」將要做「飛人」到美國舉行演唱會，農曆新年期間無緣在港謝票。
由於戲中劇情有提及男人之苦，城城自揭男人之苦，由於經常被讚靚仔，所以他要努力做運動及節食喼弗保身形。育有兩女的他看見女兒喊或發脾氣，都會給予安慰，但不是經常成功，有時也苦惱女兒發生什麼事，但他說做爸爸要接受及享受箇中樂趣。
林家棟讚周海媚好講得笑
另一方面，周海媚上月在北京家中離世，TVB最近在黃金時段重播經典作《大鬧廣昌隆》悼念。林家棟對於首套擔正的劇集可以與海媚合演感到榮幸：「她當時已經是少男少女偶像，跟她開工都好開心，在現場其實好講得笑。」幾年前，兩人曾一同受訪見過面，今日仍覺得難過：「但一個人要離開真係好難預計，願佢安息。」 |
您可能有興趣:
|
搜尋新聞
