【本報記者報道】參加2016年港姐入行的蘇韻姿（Andrea），憑無綫處境劇《愛‧回家之開心速遞》「紅衫魚」熊心如一角成功入屋，但後來傳出她的工作態度問題未有改善而遭雪藏，之後已不再見她出現《開心速遞》。下周二（4月16日）31歲生日，她以新里程做生日禮物，昨天在社交平台用港姐報名相出貼文，宣布離開效力8年的TVB。

近日已傳蘇韻姿離巢消息，她的Ig已不再見有任何無綫經理人聯絡資料，而無綫官網藝員名單她的名字也被消失。

蘇韻姿昨天中午在IG撰長文證實離巢，在文中感謝多位伯樂及「熊家」家人，最先多謝珍姐（曾勵珍）：「喺我一個人嚟到香港嘅時候，俾機會我演熊心如，令到我喺香港都可以有一個家。亦都令到多咗人認識我、有不同嘅工作，學到好多中文。多謝您咁多年嘅教導栽培。我會好好緊記你教我嘅一切。」

然後，她多謝樂小姐（樂易玲）：「由選美到入行，一路都好照顧住我，教我點樣做好一個藝人。仲有Management嘅同事，多謝你哋一直嘅照顧及幫忙，我會加倍努力！」

多謝志偉哥（曾志偉）：「你嘅指導，加上鼓勵，令到我發現自己可以有好多可能性。我會keep 住你俾我嘅正能量。」

多謝監製林建祥：「喺拍攝愛回家呢幾年嘅鼓勵、你對拍戲嘅熱情、創作力，有直啟發我，真係好榮幸能夠同你合作！」她也多謝監製鍾澍佳，「俾個好好嘅機會我參與黑色月光，令到我見識多咗，學咗好多嘢，非常期待套劇播出！」

有報道指「熊家」主人劉丹曾替蘇韻姿求情，但未能為女兒解凍。蘇韻姿昨在文中有多謝熊家人：「冇家人喺香港嘅我，感恩有你哋就有家嘅感覺。最後要多謝關心同錫我嘅台前幕後朋友仔！等緊埋位，或者收工嘅時候都會同大家一齊傾偈。我會記住一齊渡過過嘅美好時光！相信喺未來大家一定能夠再遇到，亦都想藉呢個機會衷心祝福所有朋友，能夠在自己嘅舞台上發光發亮。」

曾傳工作態度差 激嬲珍姐飛出劇組

去年傳她工作態度差又經常遲到，得罪高層「珍姐」曾勵珍，因此被踢出《愛．回家》，直至暑假才在特備節目中解凍。去年底在未播出的劇集《非份之罪》其中一個單元飾演證人。蘇韻姿未有透露未來動向，回應傳媒時亦避重就輕，很快會有消息更新。