【本報訊】昨晚八場谷草賽事，採用C+3欄C+6彎舉行，賽前預料跑道偏差較大，但跑來卻並非如此。全晚成績最佳係告東尼馬房，出馬六匹，取得2冠2亞，兩匹勝出馬分別係配徒弟吳嘉晉的「加州勇將」，以及外借另一華將巫顯東的「萬事醒」，前駒成為騎者的開齋馬，後駒則替「萬事」系馬主伍燕梅捧走聖安度碟，無獨有偶，兩駒賽前均屬處女馬身份，今次齊齊打開勝利之門，對馬主有交代。
另外，霍利時馬房昨晚派八駒上陣，分布在八場賽事之中，當中配韋達的「旅英駿爵」15倍掄元，而尾場12倍「情趣」亦告取勝，此廐另有「金飯碗」獲亞軍，以及「快趣的」跑第三，成績不俗。

梁家俊成騎師王
至於騎師方面，全晚只得梁家俊起孖，兩匹勝出馬「金碧輝煌」及「情趣」賠率分別19倍及12倍，獨贏過關二串一的話，10元落注可收2367.8元，騎者包辦頭尾胡，兼且累積28分成為騎師王，其餘贏馬騎師分別為潘頓、吳嘉晉、韋達、巫顯東、莫雷拉及柏寶。