【風花雪月／子樂】第七場第三班泥地1200米，「雲信凡高」連續四場做阿二，買W真係咪預我，但買QT的話，呢匹馬係唔錯選擇，因為跑法夠主動，往往係跑泥地最重要致勝因素，一於做膽。
「鐵胆王」上次放唔出，唔輸至奇，呢啲馬如果順利放頭，威力隨時倍增。「皇仁大師」拖腳。
第九場第二班草地1600米，「精明才子」上場終於贏番場，過程唔似有好大挑戰，最後二百米出頭，第二名「白鷺飛翔」只係得個追字，確係仲有喺手，所以唔會怕升班，至於1600米得唔得呢？呢層就要跑過至知。
「得勝駒」近仗貝湯美一再搏失，唔抵可憐啦，大摩換人十分明智。「勝利導航」偶爾殺入三甲，都會係冷門身份，拖埋冇所謂。