【风花雪月/子乐】啱啱沙田草泥地混合赛,潘顿搞到大家一镬泡,全日一场头马都赢唔到,搏来搏去得个桔,热又输,冷冷地又输,有啲仲要跑到位置不保,可用灾难嚟形容佢呢日表现。 莫雷拉今季走人,大家对潘顿相当关注,係咪可以独大,必然係我哋最关心嘅问题,而另一更关心嘅,就係佢热门马交唔交得准,雷神唔喺度,潘顿啲马一定火上加油,明明3倍卖到2倍,10倍以上嘅都会无啦啦热起上嚟,因此,佢啲热门成绩係点,绝对係马迷切身问题。 弊在呢轮佢赢马唔多,五次赛事赢得5W,平均一日一场,作为冠军级,但只得咁嘅成绩,马迷心情点会舒服,如果嚟紧两三次赛事,依然没咩起色,印象扣晒分,失晒民心。 不过话分两头,有啲马睇到潘顿係用心去跑,刚周日「美丽日子」、「同欢乐」、「京京千里」呢几只马,坚係阵上落足心机,可惜时不我予,一係畀人追到,一係追唔到人,唯有嘆句没运,至于佢几时可以转运,天知地知,但你唔知,我都唔知啰。 |
您可能有兴趣:
|