本報娛樂組報道】杜德偉(Alex)前晩(5月28日)在杭州順利舉行首個自家品牌創作MNA時裝騷,並邀好友陳小春作壓軸嘉賓為時裝騷行catwalk,掀起整晚的高潮,所有嘉賓都舉機拍照狂歡,令時裝騷成功演出。
在圈中人緣甚好的Alex獲一班好友支持,多位好友包括梁家輝夫婦、曾志偉、陳小春、鍾鎮濤(B哥)夫婦、葉童夫婦、上山詩鈉、巫啟賢等現身支持,場面星光熠熠。一班好友看得非常投入,葉童不時拿出手機拍照。
#幾分鐘catwalk 好似唱半小時個唱
第一次行catwalk的小春,完騷後接受訪問:「我仲流緊汗,行之前唔知自己要望邊到,最後唔諗啦,昂然大步挺胸行就算啦!好彩有音樂,如果冇音樂,真係騰呀!行完幾分鐘catwalk,好似唱完半個鐘頭演唱會咁!」Alex馬上反問:「係唔係呀?」小春說:「真係!唔係講笑!我picture唔到個畫面係點,如果台下冇人有反應咁點算呢?又驚有肚腩又驚條褲會甩....」Alex回應:「我啲衫點會呢?小春又咁fit!真係好多謝小春,因為獻出第一次,但佢完全駕馭到套衫,佢一行出場全場哄動,有小春成個show真係生色不少!」
其他好友志偉、B哥則投訴:「點解淨係叫小春,唔叫我哋行呀?」Alex說:「下次要要幫曾志偉設計衣服,揀套短度闊風比佢!」Alex再問小春,下次是否願意再幫手行show,小春爽快回答:「冇問題!」Alex說:「朋友就係咁樣啦!」
#Alex3歲縫製蝙蝠俠斗篷 57歲圓夢
Alex創立了10年的時裝品牌MNA,今次重新啟動MNA,找來日本設計造型師Norio Sato合作,兩人一拍即合,順利完成首季時裝show。Alex興奮地表示:「係緣份,冇諗過57歲可以圓時裝夢!」他說,早在3歲已愛上時裝:「我3歲就會問阿媽要針黹縫製蝙蝠俠斗篷,到大個少少,係有限資金下,會出去搵特別cutting嘅衣服幫自己打扮,長大後來甚至修讀設計,但入行後設計夢想一直冇機會實現,直到去咗台灣發展,同滾石竭力完成合約上最後一張唱片《脫掉》後,唱片上找不到新突破,感覺迷失自己,於是萌生咗時裝設計念頭,終於在2009年創立了MNA。」
Alex在那兩年間,由零到開始,全心追夢,但因不懂生意管理,虧損了好多錢,終於在2015忍痛停產,老婆也經常安慰他:「盡了力就可以了!」直至今天圓夢。 |