文/ 尋龍子

攝/ Madlight

Michael係灣仔私房法菜的老闆兼大廚，為人四海好傾，他問太太，其實米芝蓮神秘食客可能嚟過，如果嚟過，食物應該冇問題，出問題會係太太的招呼，他取笑老闆娘招呼未達標，當然係講笑耍花槍，這一個晚上就咁輕鬆渡過。笑聲笑聲滿載溫馨，工作枱與食客只用一塊布簾間隔，Michael 索性打開布簾讓熟客夫婦加入今次吹水，紅酒停不了，我想，這樣就是私房法國菜的特色和味道，食物味道和人情味交互作用，刺激味蕾也刺激情緒。

私房設在單棟商業大廈，佔用一層，歸一又自成一角，入口掛上巴黎鐵塔照片，牆身顏色係我最鍾意嘅橙色，專業名詞叫Exotic Bird， 內裡大慨可以坐廿零人，用棗紅色布簾間成三區，似巴黎劇院feel，當晚主區有party，但係聲音又沒有傳出來。私房菜的好處是廚房與客區一步之遙，確保食物熱騰騰上桌。其實，這不是最基本要求嗎？不過，在大餐廳太多不快經驗係你明明見到食物已經在廚房煮好等侍應傳送，就係唔見人，菜來到你面前已經變成微暖，忍不住問天，我今天做錯了甚麼錯事？

雲吞與鵝肝共舞 

講返French Table嘅食物啦，確實係有質素嘅，第一樣令我留下深刻印象係廚師自製鵝肝醬，甜酒加拔蘭地香氣四溢，一入口與眾不同嘅口味，配合適中，齒頰留香，係食咗仲要外賣帶走嘅選擇，Micheal說係佢嘅拿手絕技。另外一樣印象必食嘅仲有鵝肝雲吞，Micheal說起自創呢個fusion食物，係因為想起媽媽包的雲吞，中式嘅包雲吞手法，加入法式鵝肝，恰到好處，雲吞一口一啖，入口溶化，滑脫脫似在在舌頭上跳冰上芭蕾舞。湯品方面就蘑菇湯，夠穩陣，龍蝦湯，有性格，都係水準之作，可以配搭蝸牛。羊扒同A4和牛係主菜選擇，甜品亦有驚喜。

私房菜人間情

疫情對呢啲私房菜小店打擊好大，曾經有一段時間，生意歸零，Micheal夫婦都諗過放棄，不過又有長情熟客，為佢打氣。一位日本總經理，非常欣賞Micheal嘅食物，多番幫襯成為朋友，日本返嚟，亦必定幫襯，送上小禮物，可能就係呢啲人間小故事，幫助Micheal撐下去。最艱難時期已過，現時生意回復一些好轉，Micheal亦要多謝業主出手幫。影帝周潤發曾經來過佢尖沙嘴舊鋪，為發嫂開生日會，佢話發哥真係好好傾，冇架子。餐廳門口貼着明星名人客人與Micheal的合照，當名Micheal都幾靚仔。歲月無情人間有情，食私房菜和熱情的Michael 夫妻吹下水，係不錯嘅選擇。