文/ Aka 攝/ Aka
上次同大家去完越南，係唔係未夠皮呢？ 咁今次我地再去其他地方食好西，來一場美食之旅。台灣一定係其中一個香港人最常去嘅地方，而台灣食物都係香港人最愛之一。紅燒牛肉麵、滷肉飯、台式火鍋、台式烤肉、鹽酥雞、炸雞扒、珍珠奶茶等等係香港開到成行成市，其實唔洗飛去台灣都一定食到，但你以為小編會介紹啲咁行嘅野，你就錯啦！小編去到台灣其實最鍾意去啲小酒館、居酒屋同一班朋友閒聊暢飲，一班人嘻嘻哈哈就最快樂。
今次介紹嘅係台式居酒居－「一品活蝦」
！去開台灣嘅朋友仔冇食過到應該聽過依個品牌。台灣曾經被日本殖民半世紀，至今仍留有不少遺跡，對各個層面嘅無形影響力更加係已經溶入成台灣的一部分，其中一定包括飲食文化。而上班族嘅舒壓聖地居酒屋，可以沉澱上班後浮躁嘅心理狀態，與三五知己好友共度放鬆嘅微醺時光，係台灣同樣十分盛行，而且都能夠營造出特色嘅台式居酒屋。香港店也源用台灣以大紅燈籠作主要裝飾，加上簡單木製枱櫈，有種古樸嘅感覺。
個名叫得「一品活蝦」
，活蝦當然係主角。蝦係用泰國大頭蝦，相信鍾意食流水蝦嘅香港人一定唔會陌生，主要好食原因係新鮮彈牙，肉質紥實而且多膏，淡水蝦蝦肉味較清甜，方便吸收多款不同嘅調味醬汁。不過同台灣相比，口味選擇就比較少，但最有特色嘅幾款都有引入。
首先不得不介紹嘅係胡椒蝦，一出場就香氣四溢，胡椒獨有嘅香味已經令人食慾大增，每一隻大頭蝦都均勻沾附著胡椒，而且都開背把蝦腸清理乾淨。胡椒蝦鹹香中帶微辣，濃濃胡椒香味但唔會嗆喉。細味下，鮮甜嘅蝦肉、甘香嘅蝦膏同胡椒嘅辛鹹互相交錯，係味蕾中作出神奇嘅化學作用，作為招牌菜真係當之無愧。每次撥開蝦殼時都會忍不住啜一啜手指，再配上一啖啤酒，簡直人生一大快事。
如果唔鍾意重口味嘅，可以試下檸檬蝦，亦都非常有特色，特別在係炎炎夏日中，清爽又開胃。看似平平無奇，但食落充滿驚喜，新鮮檸檬酸味在口中爆發，然後咸咸甜甜嘅味道隨之而來，其中層次與胡椒蝦不遑多讓。檸檬嘅清香加上鮮蝦嘅甜味，真係食多多都唔會厭，再啜一口蝦頭嘅蝦膏，真係令人垂涎欲滴。值得一提嘅係餐廳會先上淡口味嘅菜式再上濃味嘅，十分細心。
鹹蜆仔
台灣地道冷盤，以醬油同蒜頭作為基調，冷泡剛剛熟的蜆仔。鹹鹹甜甜嘅滋味，配上鮮嫩嘅蜆肉，嗰種鮮甜簡直無話可說，係必試下酒物及前菜！雖然蜆仔嘅口感同生螄蚶差唔多，但店員再三強調係熟嘅，唔食得生冷野嘅朋友都可以放心食。
烤虱目魚肚
虱目魚係台灣非常常見，但香港卻十分稀少，有去過台灣嘅朋友一定會有印象。虱目魚肚烤得皮脆肉嫩，中間的魚肚油脂更加甘香可口，配搭鹽和檸檬作簡單調味，已經鮮味十足，餸啤酒更加係一流。
麻油雞
又係一道十分地道嘅台灣料理，其實佢唔算餸菜，而係湯品，除左幾件雞，基本只有麻油同老薑，所有精華都融入晒係個湯到。湯頭清甜不油膩，麻油香味徘徊係口腔，一股暖意慢慢散發，雞肉鮮嫩而且口感扎實，絕對係傳統台灣滋味。
一品活蝦
地址 ：北角京華道9-27號富利來商場地下2-4號舖
電話號碼：39969304
營業時間：星期一 全日休息
星期二至日17:00至23:45
|
搜尋新聞
