文/ Aka 摄/ Aka
上次同大家去完越南，係唔係未够皮呢？ 咁今次我地再去其他地方食好西，来一场美食之旅。台湾一定係其中一个香港人最常去嘅地方，而台湾食物都係香港人最爱之一。红烧牛肉麵、滷肉饭、台式火锅、台式烤肉、盐酥鸡、炸鸡扒、珍珠奶茶等等係香港开到成行成市，其实唔洗飞去台湾都一定食到，但你以为小编会介绍啲咁行嘅野，你就错啦！小编去到台湾其实最钟意去啲小酒馆、居酒屋同一班朋友闲聊畅饮，一班人嘻嘻哈哈就最快乐。
今次介绍嘅係台式居酒居－「一品活虾」
！去开台湾嘅朋友仔没食过到应该听过依个品牌。台湾曾经被日本殖民半世纪，至今仍留有不少遗迹，对各个层面嘅无形影响力更加係已经溶入成台湾的一部分，其中一定包括饮食文化。而上班族嘅舒压圣地居酒屋，可以沉淀上班后浮躁嘅心理状态，与三五知己好友共度放松嘅微醺时光，係台湾同样十分盛行，而且都能够营造出特色嘅台式居酒屋。香港店也源用台湾以大红灯笼作主要装饰，加上简单木制枱櫈，有种古朴嘅感觉。
个名叫得「一品活虾」
，活虾当然係主角。虾係用泰国大头虾，相信钟意食流水虾嘅香港人一定唔会陌生，主要好食原因係新鲜弹牙，肉质紥实而且多膏，淡水虾虾肉味较清甜，方便吸收多款不同嘅调味酱汁。不过同台湾相比，口味选择就比较少，但最有特色嘅几款都有引入。
首先不得不介绍嘅係胡椒虾，一出场就香气四溢，胡椒独有嘅香味已经令人食慾大增，每一只大头虾都均匀沾附着胡椒，而且都开背把虾肠清理干净。胡椒虾咸香中带微辣，浓浓胡椒香味但唔会呛喉。细味下，鲜甜嘅虾肉、甘香嘅虾膏同胡椒嘅辛咸互相交错，係味蕾中作出神奇嘅化学作用，作为招牌菜真係当之无愧。每次拨开虾壳时都会忍不住啜一啜手指，再配上一啖啤酒，简直人生一大快事。
如果唔钟意重口味嘅，可以试下柠檬虾，亦都非常有特色，特别在係炎炎夏日中，清爽又开胃。看似平平无奇，但食落充满惊喜，新鲜柠檬酸味在口中爆发，然后咸咸甜甜嘅味道随之而来，其中层次与胡椒虾不遑多让。柠檬嘅清香加上鲜虾嘅甜味，真係食多多都唔会厌，再啜一口虾头嘅虾膏，真係令人垂涎欲滴。值得一提嘅係餐厅会先上淡口味嘅菜式再上浓味嘅，十分细心。
咸蚬仔
台湾地道冷盘，以酱油同蒜头作为基调，冷泡刚刚熟的蚬仔。咸咸甜甜嘅滋味，配上鲜嫩嘅蚬肉，嗰种鲜甜简直无话可说，係必试下酒物及前菜！虽然蚬仔嘅口感同生蛳蚶差唔多，但店员再三强调係熟嘅，唔食得生冷野嘅朋友都可以放心食。
烤虱目鱼肚
虱目鱼係台湾非常常见，但香港却十分稀少，有去过台湾嘅朋友一定会有印象。虱目鱼肚烤得皮脆肉嫩，中间的鱼肚油脂更加甘香可口，配搭盐和柠檬作简单调味，已经鲜味十足，餸啤酒更加係一流。
麻油鸡
又係一道十分地道嘅台湾料理，其实佢唔算餸菜，而係汤品，除左几件鸡，基本只有麻油同老姜，所有精华都融入晒係个汤到。汤头清甜不油腻，麻油香味徘徊係口腔，一股暖意慢慢散发，鸡肉鲜嫩而且口感扎实，绝对係传统台湾滋味。
一品活虾
地址 ：北角京华道9-27号富利来商场地下2-4号舖
电话号码：39969304
营业时间：星期一 全日休息
星期二至日17:00至23:45
|
搜寻新闻
