【本報記者報道】影帝梁朝偉昨早(12月19日)激罕現身商台,接受林海峰(Jan)、阮子健和盧覓雪主持的《在晴朗的一天出發》訪問,宣傳新戲《金手指》。梁朝偉曾以歌手身分上商台谷歌,相隔多年後再到訪,震撼整個商台。
開咪時,林海峰以破天荒形容偉仔做嘉賓:「我哋節目未試過有嘉賓,你係第一個。」偉仔說:「第一次咁早宣傳,聽眾唔慣我咁早起身。」大家閒話家常,偉仔笑言近來晏起床,「最近呢個月係咁,唔知點解,你知我個人情緒化。」
近變「晏人」 自稱情緒化
偉仔分享戲中角色:「只聽到有呢個案件及呢個人物,好空洞,唔知點解咁,今次有機會探討。(點做功課?)導演畀咗啲案件一啲資料我,我睇完之後『嘩!真係不可思議』,都幾有興趣去試。(點諗呢個角色?)因為呢個人好神秘,變咗我唔係好知道點樣做。」
偉仔續說:「導演希望我唔好照抄,有自己創作,唔好照足真人咁樣做,原本個人有幽默感、好有魅力、好識交際(減咗幽默感?)減晒,我又覺得係咪可以試下,一個人可以喺咁短時間裏面,突然間變成咁有錢、咁有影響力嘅人,係咪可以囂張啲、意氣風發啲。開頭設定佢係生意失敗工程師,嚟到香港遍地黃金,好多機會,咁後來機緣巧合,借殼上市炒股票;然後嗰個人嘅轉變,變到失控,覺得自己係神。」
偉仔說,憑幻想去演活戲中人物:「睇一啲關於金融詐騙真實故事嘅書,我對於金融嘅世界一啲都唔知。」
林海峰(Jan)讚偉仔勤力好學,如學滑水及滑雪,問到是否很好學?他說:「我工作需要,每次角色唔一樣,每次學唔同嘅嘢,我好多機會接觸唔同嘢。我必須要學,唔學個人會好虛,準備幾多得幾多。《一代宗師》學功夫,唔係話打得好睇,但建立咗信心,去現場拍戲安心好多。」
Jan又讚偉仔平時學習多以鑽研形式為主:「佢私下玩嘅嘢,都係鑽研形式,無論藝術上、玩樂,尤其係運動都鑽研好深。」偉仔聞言說:「貪玩啫﹗有時睇到啲嘢想同人分享。」
《無間道》重聚是接拍《金》誘因
偉仔說,今次拍《金手指》,有種Reunion(團聚)的感覺,而且跟劉德華和莊文強合作愉快:「今次又係莊文強,佢特登咁樣整故仔引我去拍,如果我冇一個實質人物,我諗唔到係點拍,我就唔拍,佢整咗個藍本,重聚梗係一個誘因,同華仔合作30幾40年,莊文強拍《無間道》時,合作好愉快,除咗拍戲,平時都有交往,傾電影、傾書本,佢(莊文強)一直有畀劇本我睇,我推咗好多次,咁我真係冇feel(感覺),人哋睇咗人哋覺有feel會做得好,我睇咗覺得冇feel,咁即係我未必做得好。」
罕談劉德華 讚好照顧人
偉仔大讚劉德華照顧人,並憶起拍《鹿鼎記》點滴,他說:「大家做好朋友,當年拍咗幾十集,有一段時間一齊,建立好特別關係、同埋建立好多信任,我相信個默契喺嗰時建立。(之後就係無間道、金手指?)中間都拍過一啲爛爛哋、冇乜人記得嘅戲。(搭飛機時睇自己電影?)點都唔睇,睇第二啲戲。」
偉仔謙稱,人愈大,變得愈來愈懶:「太多包袱,好驚一樣嘢做出嚟唔好呀。(《新紮師兄?》)享受當年演出,冇包袱,冇乜人對你有咩期望,反而自己鍾意點做都得。我同熟朋友就會放啲。」
記錯偉仔演《咖喱辣椒》 林海峰失言
商台的訪問爆出一個小插曲,林海峰訪問偉仔時說,很懷念演喜劇的偉仔,更只想再看他演《咖喱辣椒》,偉仔沒有回應,只尷尬地以笑帶過。林海峰再追問「即刻唔答我」,偉仔解釋:「我反而享受嗰陣啲演出,因為冇包袱,冇乜人對你有咩期望。」其實,林海峰說的電影《咖喱辣椒》(1990年)是由周星馳與及張學友主演,偉仔沒參演,難怪場面非常尷尬,及至訪問後,林海峰在社交網發貼文道歉。 |
您可能有興趣:
|