啲人成日话「隔篱饭香」，其实隔篱饭有几香呢？Anyway，我大食小记之前教大家整嘅「叮叮cupcake」都受欢迎喎，好，今期再嚟好嘢益大家先！我近排发掘到电饭煲嘅新潜能，其实係同啲网友倾倾下，发现原来一班姊妹出嚟girl's talk，梗係要有啤酒嘅，但好多时都饮唔完㗎喎，咁就一定唔可以浪费啦。 仲有啊，近排咖啡久不久都会大减价，不过买咗十几廿罐返嚟，饮咗肯定瞓唔着，基本上买咗返嚟原来得个摆字，一样係唔可以浪费㗎。一于係咁！拎个电饭煲，放一堆洗咗嘅米落去，再倒啲啤酒或者咖啡落去，就用电饭煲煲出香喷喷嘅「啤酒饭」同「咖啡饭」啦！Text◎大食小记 Photo◎Raby
啤酒饭
无错！啤酒都可以煮饭！其实啤酒煮饭真係会较易令人接受嘅，平时都听阿妈讲用啤酒煮嘢食，例如啤酒煮蚬啊、啤酒炆牛肉啊、啤酒鸡翼啊咁。平时用啤酒煮嘢食，仲可以去腥味雪味，咁啤酒煮饭你又觉得点呢？快啲跟我大食小记试下啦！
点整先？
嗱，首先就要将蒜头切粒，之后可以将米、鸡肉粒、蒜粒，一齐倒入电饭煲，再加入啤酒，落少少盐，落埋淡味酱油，即係喺一啲超市裏面会出现嘅低盐酱油喇。开电饭煲，同平时煮饭咁一样，然后等佢跳掣，打开饭盖，搵个碗，搵只spoon，食啦！
专业团队试食
小紬：「成个饭都好香，重点係蒜味！加上鸡肉唔老，啤酒做到松肉嘅功用。两样嘢估唔到可以match到咁，令我想一食再食。佢好似台湾麻油鸡嗰只味道，所以好唔错。呢个饭係色香味俱全。」
米奇：「成个饭都好入味。因为加咗蒜真係一绝，嗰只香味真係不得了，谂起都想食。鸡其实无乜啤酒香，不过都几好味，可能有其他啲调味料，所以都好正。啤酒又唔会整到啲饭好干，仲好湿润，所以口感都好好。」
Max：「本来以为係个伏，点知食落又几好，算大食小记今次终于放我一马。不过我觉得可以再香啲，应该要好似『中华一番』咁赞就差唔多啦，仲要係爆三嗰只。不过对大食小记嚟讲算係咁啦！」
华华：「好似醉鸡咁嘅味，仲要好香，令到成间房都香喷喷。呢个饭每一粒米都令人垂涎三尺，一个字『正』！」
抄士：「香！香！好香！呢个饭绝对係好滋味。啤酒绝对能够带出整个饭嘅余香！嚿鸡仲可以送埋饭，食完係要再食。加上整法咁简单，真係一个好好食嘅『颓』饭。」
------------------------
咖啡饭
整完啤酒饭，就嚟整咖啡饭喇！唔好以为我大食小记讲笑啊，真係直接用饮品代替清水，放入电饭煲煮就得㗎喇。呢个咖啡饭其实係我大食小记同啲日本网民倾倾下炮制出嚟嘅，佢哋就再喺网上公开食谱，咁我就再喺度将呢个咁认真嘅食谱发扬光大啦！
点整先？
步骤好简单㗎咋，煮饭时要落几多水，你就落返同等分量嘅咖啡。当今次煲一样係煲两mug米啦，就落350毫升嘅罐装无糖咖啡，然后好似平时煮饭咁煮。记得煮熟咗就再搅下啲饭，呢个时侯已经闻到阵阵嘅咖啡香味，之后再因应你嘅个人口味，加啲盐啊、胡椒啊、芝麻啊嗰类调味料就搞掂啦！叮一声！咪有得食啰。
专业团队试食
小紬：「其实比想像中好。我本身係怕有苦味或者怪味，点知无，都算係咁啦！最唔好嘅係啲味道太单一，只係得啲咖啡味。其实我觉得加啲蔬菜会变得fresh啲，加啲肉又会口感好啲，或者加下啲紫菜、白芝麻嗰类嘅调味料会靓好多，色彩会更美。」
米奇：「饭太干啦！加上饭无咗应有嘅湿度，无乜口感。我建议下次试加水、加盐或者可以加下『咖啡伴侣』，咁样只味应该会正好多。咖啡饭嘅感觉同鱼饭好似，但係变咗咖啡味。论味道就更加係好一般啦，所以係可以再改善一番。」
Max：「个饭係满足到嗅觉，但係满足唔到我嘅味觉呢。香得嚟但係食落又无味，要加下其他嘢调下味会好啲。」
华华：「呢个係另类饮咖啡嘅方法，啲饭有种咖啡嘅甘同香，饮完我仲好似精神咗????啊！不过我建议加下肉加下调味料会好啲嘅，始终依家太似就咁食紧净饭喇，食饭要配下餸先正。」
抄士：「有咖啡香，食落去唔够湿，有啲干。加上佢有啲啲甜仲有啲啲苦，一个咁奇怪嘅煮法煮得出咁嘅味算係咁啦。要加下其他配料会更好，或者有其他色会更靓。我建议一下大食小记可以试下用奶都应该会唔错。」
---------------
总 结
几乎每个香港人嘅屋企都有个电饭煲，洗几粒米、煮个饭、揿个掣，相信几懒嘅人都可以做到！呢个教学有无令你学懂何谓「一镬熟」呢？仲熟得好正正子。以后姊妹们唔使再妒忌市面上只有「男人嘅浪漫」嘅豆腐火腩饭喇，我哋女人嘅浪漫就係咖啡饭，男人们就可以转下你嘅浪漫食下啤酒饭啰！
喺呢度我大食小记再畀多个tips大家啦，其实用有奶或者有糖嘅咖啡煮咖啡饭，制成品会似咖啡甜品。如果用无糖咖啡，就要加入盐等调味料，先会更加好味。啤酒饭远睇似糯米饭，但係真係唔使怕酒精浓度高，因为煮嘅时候已经蒸发咗咁滞。我大食小记今次自己就不加评语喇，评审啲评语够中肯啦，费事你哋成日话我自夸啊。我真係入得厨房出得厅堂㗎，应该好快就可以嫁出去喇！ |
搜寻新闻
